“Muri kuduhatiriza gutangira ku bashidikanyaho”-Gen Mubarakh abwira abakinnyi ba APR FC
Nyuma yuko APR FC inganyije na Gasogi United bigatuma amahirwe iyi kipe ifite yo gutwara igikombe cya Shampiyona agabanuka kuko yahise inganya na Kiyovu Sports amanota 53. kuri uyu wa mbere Tariki ya 17 Mata 2023, Chairman wa APR FC, Lt Gen, Mubarakh Muganga yabwiye abakinnyi ba APR FC, ko ubuyobozi butishimiye imyitwarire yabo.
Yagize ati, “ Mbere na mbere mbabwire ko tutishimye kubera uko murimo kwitwara haba mu mikinire na discipline. Murimo gutuma dutekereza ko twaba twaribeshye ku bushobozi bwanyu, nyamara muri abakinnyi beza bashoboye.”
Yakomeje agira ati: “ Muri kuduhatiriza gutangira ku bashidikanyaho.” Yababwiye ko batisubiyeho bamwe bazatandukana n’ikipe nyuma y’uyu mwaka w’imikino.
Avuze ibi mu gihe muri weekend ishize umutoza wungirije wa APR FC, umunya-Tuniziya Jamel Eddine Neffati, yerekanye imyitwrire idahwitse ku kibuga, yakuyemo ikoti ry’ikipe ye arikubita hasi nyuma yo kwerekwa ikarita y’umuhondo kubera ko atishimiye ibyemezo by’abasifuzi, iki gikorwa yakoze nyuma gituma ahita ahabwa ikarita itukura. Hari ku mukino wa 26 wa Shampiyona, APR FC yaguyemo miswi na Gasogi United.
@igicumbinews.co.rw
Kanda hasi ukurikire ibiganiro tukugezaho ku Igicumbi News Online TV:
