Ingabo z’u Burundi mu mirwano yo muri RDC
Amakuru aturuka mu nzego z’umutekano no ku mirongo y’urugamba avuga ko ingabo z’u Burundi ziri koherezwa mu burasirazuba bwa Repubulika Iharanira Demokarasi ya Congo zikomeje guhura n’ibihombo bikomeye by’abasirikare n’ibikoresho mu mirwano ibahanganishije n’imitwe yitwaje intwaro, harimo na M23.
Nk’uko ayo makuru akomeza abivuga, habaye impinduka mu buryo bwo gucunga imirambo y’abasirikare bapfa ku rugamba. Mu bihe byashize, imirambo yajyanwaga ahantu hamwe hagenwe, harimo n’ahazwi ku izina rya “Guantanamo”, cyangwa igashyirwa mu bubiko bukonje mbere yo gushyingurwa. Ubu ariko bivugwa ko iyo migirire yahindutse, aho imirambo itakijyanwa hamwe, ahubwo isubizwa mu bice cyangwa mu makambi abasirikare bakomokamo mu gihugu cy’u Burundi.
Ku bijyanye no kohereza ingabo nshya, amakuru avuga ko hagati mu kwezi kwa Mata hagiye hoherezwa undi mutwe w’abasirikare barenga 600 bo muri batayo ya 411. Bavugwa ko bavuye i Rumonge ku kiyaga cya Tanganyika, bakoresheje ubwato berekeza i Baraka muri RDC, aho bageze bakihutira kwinjira mu bikorwa by’imirwano mu rwego rwo gushyigikira bagenzi babo bari ku rugamba.
RPA ivuga ko amasoko, yaba ayegereye ubuyobozi bukuru bw’ingabo ndetse n’ayandi ari ku mirongo y’imbere, avuga ko mu mirwano yo mu byumweru bishize habaye igihombo gikomeye. Mu byo bavuga, harimo imirwano yabaye ku itariki ya 19 Mata mu duce twa Mikenke, Gicumbi, Abara na Point Zéro, aho bivugwa ko abasirikare barenga 100 bakomerekeye bikabije, mu gihe abandi barenga 12 bahasize ubuzima.
Bongeraho ko ibi bitero n’imirwano nk’iyi bikomeje kugaruka mu gihe cy’ukwezi kumwe kugeza kuri abiri, bigatuma igihombo gikomeza kwiyongera.
Ku bijyanye n’imirambo y’abaguye ku rugamba, bivugwa ko hari igihe isigara muri RDC bitewe n’uko imirwano iba ikomeye, cyangwa igasubizwa mu Burundi ariko itakirundwa mu buryo bwari busanzwe bwo kuyijyana ahantu hamwe mbere yo kuyishyingura.
Nubwo nta mvugo yemewe ku rwego rw’ubuyobozi bwa gisirikare yatangajwe kuri ibi bivugwa, hari abasirikare bavuga ko batishimiye uburyo bari koherezwa mu ntambara. Bavuga ko batumva neza impamvu y’iyo mirwano ndetse bagasaba ko bakurwa muri ibyo bikorwa, bavuga ko bibagora kandi nta musaruro ugaragara babibonamo.
