Gicumbi: Urubyiruko rwavuye mu bigo ngororamuco rwahawe amagare yo kurufasha kwiteza imbere

Urubyiruko rwavuye mu bigo ngororamuco bitandukanye rwo mu Karere ka Gicumbi rwashyikirijwe amagare azarufasha kwihangira imirimo no kongera kwiyubaka mu buzima busanzwe, mu rwego rwo gukomeza kurufasha kwirinda gusubira mu bikorwa byarushyira mu makosa.

Iki gikorwa cyabaye kuri uyu wa Kabiri, tariki ya 14 Nyakanga 2026, ku cyicaro cy’Akarere ka Gicumbi, kiyobowe n’Umuyobozi w’Akarere ka Gicumbi, Nzabonimpa Emmanuel, afatanyije n’inzego z’umutekano ndetse n’abafatanyabikorwa batandukanye.

Abahawe aya magare ni urubyiruko rwibumbiye mu itsinda “Hinduka Uhindure” ndetse n’abandi barangije gahunda zo kugorororwa mu bigo ngororamuco, bakagaragaza imyitwarire myiza n’ubushake bwo kwiteza imbere.

Bamwe mu bahawe amagare baganiriye na Igicumbi News, bavuga ko ari amahirwe akomeye azabafasha kubona imibereho binyuze mu mirimo yemewe n’amategeko, bityo bakirinda kongera kwisanga mu bikorwa bishobora kubasubiza mu byaha.

Yamugiriye, umwe mu bahawe igare uturuka mu Murenge wa Shangasha, yavuze ko yizeye ko iryo gare rizamuhindurira ubuzima.

“Iri gare rigiye kumfasha kwiteza imbere. Mbere nakoreshaga ikiyobyabwenge cya kanyanga, ariko narabiretse kandi sinzongera kubisubiramo. Kuba naragiye mu kigo ngororamuco ntabwo byari ugupfa, ahubwo byamfashije kugororoka no kugaruka mu buzima busanzwe. Ndasaba urubyiruko rukoresha ibiyobyabwenge kubireka rugakora ibikorwa byemewe n’amategeko kugira ngo rwubake ejo harwo heza.”

Muri iki gikorwa, hatanzwe amagare 13, buri rimwe rifite agaciro k’amafaranga y’u Rwanda 150,000 Frw. Abayahawe bavuga ko bazayakoresha mu gutwara abagenzi cyangwa imizigo, bitewe n’ibyo bazahitamo, kugira ngo babone amafaranga abafasha kwiteza imbere no kwita ku miryango yabo.

Umuyobozi w’Akarere ka Gicumbi, Nzabonimpa Emmanuel, yavuze ko uretse amagare, hari n’abandi bahawe ibikoresho bibafasha gukora imyuga bize, birimo imashini zidoda n’ibikoresho byifashishwa mu bwubatsi no mu bubaji.

Yagize ati:

“Aba ni abantu bagaragaje imyitwarire myiza nyuma yo kuva mu bigo ngororamuco bitandukanye, harimo n’Ikigo cya Iwawa. Twashimye ubufatanye bwa Polisi y’u Rwanda n’abandi bafatanyabikorwa bagize uruhare muri iki gikorwa. Intego ni ukubafasha kugira icyo bakora, bityo kutagira akazi ntibibe urwitwazo rwo gusubira mu bikorwa bitemewe n’amategeko.”

Yakomeje asaba abahawe ibi bikoresho kubifata neza no kubikoresha mu buryo bubyara inyungu, anagaragaza ko gahunda yo gufasha abarangije kugorororwa izakomeza uko ubushobozi buzagenda buboneka.

Yagize ati:

“Ntabwo dushishikariza abantu kujya mu bigo ngororamuco kugira ngo bazahabwe ibi bikoresho. Intego ni ugufasha abatishoboye bagaragaje ubushake bwo guhindura ubuzima bwabo, kugira ngo babashe kwiteza imbere.”

Abahawe amagare basinye amasezerano agaragaza inshingano bafite zo kuyakoresha neza no kutayagurisha. Abafite ingo bari baherekejwe n’abo bashakanye, mu gihe urubyiruko rutarashaka rwari rwazanye n’ababyeyi cyangwa abandi barera.

Ubuyobozi bw’Akarere ka Gicumbi bwavuze ko gukomeza gushyigikira abarangije gahunda zo kugorororwa biri mu ngamba zigamije kubafasha kongera kwinjira neza mu muryango nyarwanda, kwihangira imirimo no kugira uruhare mu iterambere ry’igihugu.

Inkuru: Emmanuel Niyonizera Moustapha / Igicumbi News