Ikipe ya Dynamo BBC yo mu Burundi yatewe mpaga kubera kwanga kwambara Visit Rwanda
Ikipe ya Dynamo BBC yo mu gihugu cy’u Burundi iri mu mu mikino y’igikombe cy’Afurika muri Basketball, yatewe mpaga mu mukino yari igiye guhuriramo na FUS Rabat yo muri Maroc kuri iki cyumweru Tariki 10 Werurwe 2024, i Peretoria muri Afurika y’Epfo kubera kwanga kwambara ibirango bya Visit Rwanda by’umwe baterankunga bakuru muri iri rushanwa.
Mu mukino Dynamo BBC yakinnyemo na Cape Town Tigers ikanawutsinda mu ijoro ryo kuri uyu wa Gatandatu Tariki 09 Weruwe 2024, yasibye ibirango bya Visit Rwanda kubera impamvu za Politike ziri hagati y’ibihugu by’u Burundi n’u Rwanda.
Kubera izi mpamvu Kuri iki cyumweru Ishyirahamwe rya Basketball muri Afurika ryasohoye Itangazo rigira riti: “Dynamo Basketball Club itewe mpaga mu mukino yagombaga gukinamo na FUS Rabat Basketball yo muri Maroc, kuri iki cyumweru Tariki ya 10 Werurwe 2024, kuri SunBet Arena kubera kwanga kubahiriza amategeko agenga imyambaro”.
Uyu mukino wagombaga gukinwa saa kumi za Pretoria muri Afurika y’Epfo ari nayo saha yo mu Rwanda no mu Burundi. Ikipe ya Dyanamo iri mu itsinda ryitiriwe Kalahari ririmo Petro de Luanda yo muri Angola, FUS Rabat yo muri Maroc na Cape Town Tigers yo muri Afurika y’Epfo.
@igicumbinews.co.rw
Kanda hasi ukurikire ibiganiro tukugezaho ku Igicumbi News Online TV:
