Perezida Museveni yasubije abavuga ko Umuhungu we Gen Muhoozi abangamira abaturage

Perezida wa Uganda, Yoweri Kaguta Museveni, yavuze ko ibikorwa by’umutekano biri gukorwa n’inzego z’igisirikare n’iz’umutekano ziyobowe n’Umugaba Mukuru w’Ingabo za Uganda (CDF), Muhoozi Kainerugaba, bikorwa mu buryo bukurikiza amategeko kandi bifite intego yo kurinda umutekano w’igihugu.

Ibi Perezida Museveni yabigarutseho mu ijambo yagejeje ku baturage ryerekeye uko igihugu gihagaze, ari mu biro by’umukuru w’igihugu,  biri Entebbe, kuri uyu wa gatandatu Tariki 04 Nyakanga 2026.

Museveni yasubije abanenze ibikorwa by’umutekano

Mu ijambo rye, Perezida Museveni yasubije ibitekerezo byatanzwe na Inter-Religious Council of Uganda, ihuriro rihuza amadini n’amatorero muri Uganda, ryari ryagaragaje impungenge ku buryo inzego z’umutekano zikomeje gukora ibikorwa byo guta muri yombi abantu bakekwaho ibyaha.

Iryo ihuriro ryavuze ko hari impungenge z’uko uburyo inzego z’umutekano zikora bushobora gutuma abantu bibuka ibihe byaranze ubutegetsi bwa Idi Amin na Milton Obote, aho Uganda yashinjwaga kurangwa n’ihohoterwa rikomeye ry’uburenganzira bwa muntu.

Perezida Museveni yavuze ko kugereranya ibihe bya none n’ibyabaye mu myaka yashize bidakwiye, ashimangira ko hari itandukaniro rikomeye hagati y’ibyakorwaga icyo gihe n’ibikorwa biri gukorwa ubu.

“Abakekwaho ibyaha barafatwa bakagezwa imbere y’ubutabera”

Museveni yavuze ko ubu inzego z’umutekano zifata abantu zikekaho ibyaha zikabashyikiriza ubutabera aho kubica, avuga ko ari ikimenyetso cy’uko amategeko yubahirizwa.

Yasobanuye ko intego y’ibikorwa by’igisirikare n’izindi nzego z’umutekano atari uguhutaza abaturage, ahubwo ari ukurwanya ibyaha no kurinda umutekano w’igihugu.

Yongeyeho ko igihugu gifite inshingano zo gukumira ibikorwa bishobora guhungabanya umutekano, ariko ibyo bikaba bigomba gukorwa hakurikijwe amategeko n’inzego zibifitiye ububasha.

Impaka zikomeje ku mikorere y’inzego z’umutekano

Mu minsi ishize, ibikorwa by’inzego z’umutekano muri Uganda byakomeje kugibwaho impaka n’abatavuga rumwe n’ubutegetsi ndetse n’imiryango iharanira uburenganzira bwa muntu, bavuga ko hari abantu bata muri yombi mu buryo budatanga ibisobanuro bihagije cyangwa bagafungwa igihe kirekire bataragezwa mu nkiko.

Ku rundi ruhande, ubutegetsi bwa Uganda buvuga ko ibikorwa nk’ibi bigamije kurwanya iterabwoba, ibikorwa by’ubugizi bwa nabi n’abashobora guhungabanya ituze ry’igihugu.

Gen. Muhoozi akomeje kugira uruhare rukomeye mu mutekano

Gen. Muhoozi Kainerugaba, umuhungu wa Perezida Museveni, ni we uyoboye Ingabo za Uganda nka Chief of Defence Forces (CDF). Mu gihe amaze kuri uyu mwanya, ibikorwa by’igisirikare ndetse n’ibitekerezo atangaza ku mbuga nkoranyambaga byakomeje gukurura ibitekerezo bitandukanye haba muri Uganda no mu karere ka Afurika y’Iburasirazuba.

Ku wa 28 Kamena 2026, inzego z’umutekano za Uganda zafunze by’agateganyo ibiro bya Daily Monitor na NTV Uganda, ibitangazamakuru bya Nation Media Group. Abapolisi n’abasirikare bagose ibiro byabyo, babuza abanyamakuru n’abakozi kubikoreramo. Ibi byakurikiye inkuru zavugaga ko bibangamiye umutekano w’igihugu.

Ifatwa rya Dr. Kizza Besigye (16 Ugushyingo 2024)

Ku wa 16 Ugushyingo 2024, Kizza Besigye yafatiwe i Nairobi muri Kenya, aza kugezwa muri Uganda aho yashinjwe ibyaha bifitanye isano n’umutekano w’igihugu. Nyuma y’ifatwa rye, Gen. Muhoozi Kainerugaba yemeje ku rubuga X ko Besigye ari mu maboko y’inzego z’umutekano za Uganda, ibintu byakuruye impaka ku rwego rw’imbere mu gihugu na mpuzamahanga.

Ifungwa rya Erias Lukwago (26 Gicurasi 2026

Ku wa 15 Kamena 2026, Erias Lukwago, umunyamategeko wabaye Meya w’Umujyi wa Kampala, yatawe muri yombi n’abashinzwe umutekano bari bagose urugo rwe. Ashinjwa guhisha amakuru agamije kugambanira ubutegetsi.

Nubwo hari abakomeje kunenga uburyo inzego z’umutekano zikora, Perezida Museveni we yavuze ko ibikorwa byazo biri mu murongo w’amategeko kandi ko bizakomeza gushyigikirwa mu rwego rwo kubungabunga umutekano w’igihugu.