Rwanda: Kuri iki cyumweru hagaragaye abandi bantu banduye Coronavirus
Amakuru mashya ya Minisiteri y’Ubuzima aravuga ko mu Rwanda kuri iki Cyumweru tariki 05 Mata 2020, hagaragaye abandi bantu babiri barwaye Coronavirus, nk’uko itangazo rya Minisiteri y’Ubuzima ribivuga.
Ibi byatumye umubare w’abarwaye Coronavirus mu Rwanda ugera ku bantu 104. Muri aba, bane bakaba bakize banasezererwa mu bitaro.
Itangazo rya Minisiteri y’Ubuzima rivuga ko abo barwayi babiri bagaragaye uyu munsi ari abatahuwe ko bahuye n’abandi barwaye Coronavirus mu Rwanda.
Minisiteri y’Ubuzima kandi ivuga ko abo bagaragaweho Coronavirus bose bahise bashyirwa mu kato, kandi hakomeje gushakishwa abantu bose bahuye na bo, kugira ngo basuzumwe ndetse bitabweho n’inzego z’ubuzima.
Abarwayi ba Coronavirus mu Rwanda bose bavurirwa ahantu habugenewe, kandi bari koroherwa, abenshi muri bo bakaba nta bimenyetso bakigaragaza kandi ntawe urembye.
Minisiteri y’Ubuzima isaba Abaturarwanda bose gukomeza kwitwararika, bakurikiza ingamba zafashwe na Leta y’u Rwanda.
Ibimenyetso by’ingenzi bya Coronavirus ni inkorora, guhumeka bigoranye, n’umuriro. Umuntu wese ugaragaza ibi bimenyetso asabwe kwihutira guhamagara umurongo utishyurwa ari wo 114 cyangwa akitabaza umujyanama w’ubuzima umwegereye.
@igicumbinews.co.rw
