Burkina Faso yahagaritse umubano yari ifitanye n’u Bufaransa
Guverinoma ya Burkina Faso yatangaje ko kuva kuri uyu wa 26 Kamena 2026 yahagaritse ku mugaragaro umubano wa dipolomasi yari ifitanye n’u Bufaransa, ivuga ko isanga impande zombi zitakiri ku rwego rwatuma zikomeza ubufatanye bushingiye ku kubahana no kubaha ubusugire bwa buri gihugu.
Ibi byatangajwe mu itangazo ryashyizweho umukono n’Umuvugizi wa Guverinoma ya Burkina Faso, Pingdwendé Gilbert Ouedraogo, rivuga ko icyo cyemezo cyafashwe nyuma yo gusuzuma uko umubano hagati y’ibihugu byombi wari umeze muri iki gihe.
Guverinoma ya Burkina Faso ivuga ko ibona ibintu by’ingenzi byagombaga kuranga uwo mubano bitakiriho. Muri byo harimo kubahana hagati y’impande zombi, kugirirana icyizere no kutivanga mu bibazo bireba ubutegetsi bw’igihugu cyigenga.
Nk’uko Guverinoma ibivuga, ishinja ubutegetsi bw’u Bufaransa ibikorwa ivuga ko bibangamiye inyungu za Burkina Faso. Muri iryo tangazo, inavuga ko hari ibyo yise imigambi ya gikoloni mishya ndetse n’inkunga ivuga ko u Bufaransa buha imitwe ishaka guhungabanya umutekano n’imitwe y’iterabwoba ikorera muri Burkina Faso no mu karere ka Sahel.
Guverinoma ya Burkina Faso kandi ivuga ko uburyo igihugu cyayo kivugwaho mu rwego mpuzamahanga bubogamye, kuko bugaragaza isura mbi ishobora kugitesha icyizere mu muryango mpuzamahanga.
N’ubwo yahagaritse umubano wa dipolomasi n’u Bufaransa, Guverinoma ya Burkina Faso yashimangiye ko icyo cyemezo kitareba abaturage b’ibihugu byombi cyangwa amateka asanzwe ayihuza n’Abafaransa. Ivuga ko umubano w’abaturage, uw’umuco n’uw’imibereho usanzwe hagati y’impande zombi ukomeje kubahwa.
Yanatangaje ko abaturage b’Abafaransa ndetse n’abandi banyamahanga baba muri Burkina Faso bazakomeza kurindwa, ndetse inyungu zabo zigakomeza kubungabungwa hakurikijwe amategeko y’igihugu.
Guverinoma yasabye abaturage ba Burkina Faso gukomeza kugaragaza ituze, kubaha amategeko no kwirinda ibikorwa ibyo ari byo byose bishobora guhungabanya umutekano cyangwa kubangamira abanyamahanga batuye muri icyo gihugu.
Mu gusoza, Guverinoma ya Burkina Faso yavuze ko izakomeza gukurikiza politiki y’ububanyi n’amahanga yigenga, ishingiye ku kwagura ubufatanye n’ibindi bihugu, cyane cyane ibyo mu Majyepfo y’Isi, ndetse no guteza imbere umubano ushingiye ku bwubahane, ubusugire bw’ibihugu no guteza imbere amahoro, umutekano n’iterambere rirambye.
Yongeyeho ko Burkina Faso igifunguye amarembo y’ibiganiro n’ibindi bihugu byose, igihe cyose uwo mubano uzaba ushingiye ku kubahana, uburinganire bw’ibihugu no kurengera inyungu za buri ruhande.
