AMAFOTO: Arsenal yaraye ihuye n'uruva gusenya

Umukino wari utegerejwe na benshi ku isubukurwa rya Shampiyona y’Icyiciro cya Mbere mu Bwongereza, Premier League, warangiye Manchester City inyagiye Arsenal y’abakinnyi 10 ibitego 3-0.

Premier League yari yahagaritswe muri Werurwe kubera icyorezo cya Coronavirus, yongeye gusubukurwa kuri uyu wa Gatatu, tariki ya 17 Kamena 2020, nyuma y’iminsi 100.

Nk’uko bizanakorwa mu mikino 10 izaba mu mpera z’icyumweru, uyu munsi amakipe yaje yambaye imyambaro yanditseho ijambo “Black Lives Matter” ahasanzwe handikwa amazina y’abakinnyi mu rwego rwo kunamira umwirabira w’Umunyamerika, George Floyd, wapfuye nyuma yo gupfukamirwa ku ijosi n’umupolisi w’umuzungu.

Abakinnyi bose n’abasifuzi babanje gupfukama mu rwego rwo guha icyubahiro uwo mwirabura ndetse hafatwa n’umunota wo kwibuka abahitanywe na Coronavirus.

Ku myambaro y’abakinnyi, ku kuboko kw’iburyo, hariho ikirango cya Black Lives Matter mu gihe mu gatuza hariho ikirango gikoze mu mutima cyo kuzirikana akazi gakomeye kakozwe n’inzego z’ubuzima mu bihe bya Coronavirus.

Muri Stade ya Etihad yambaye ubusa (mu muhezo), Manchester City yarushije Arsenal mu buryo bugaragara nubwo Eddie Nketiah yashoboraga kuba yafunguye amazamu mu minota ya mbere.

Byabaye ngombwa ko Arsenal ikora impinduka hakiri kare nyuma y’uko na Granit Xhaka yavunitse ku munota wa munani, asimburwa na Dani Ceballos.

David Luiz wagiye mu kibuga asimbuye Pablo Mari ku munota wa 24, yakoze ikosa ryavuyemo igitego cya mbere cya Manchester City mu minota y’inyongera y’igice cya mbere, Raheem Sterling afungura amazamu.

Arsenal yasigaye ari abakinnyi 10 mu kibuga nyuma y’uko David Luiz yahawe ikarita itukura akiniye nabi Riyad Mahrez mu rubuga rw’amahina, hatangwa penaliti yinjijwe neza na Kevin De Bryune, Manchester City iba igize ibitego 2-0.

Habura iminota 10 ngo umukino urangire, myugariro Eric Garcia wa Manchester City, yagonganye n’umunyezamu we, Ederson Moraes, amara iminota icyenda avurirwa mu kibuga mbere yo gusohorwa mu kibuga ari ku ngobyi.

Sergio Kun Agüero wari wasimbuye Gabriel Jesus, yafashije Manchester City gukomeza gusatira ndetse ibona igitego cya gatatu ku munota wa gatatu w’inyongera muri 11 yari imaze gushyirwaho, cyatsinzwe na Phil Foden.

Gutsinda uyu mukino byafashije Manchester City kugira amanota 60, yigiza inyuma iminsi yo gutwara igikombe kuri Liverpool iyirusha amanota 22. Ikipe y’umutoza Jürgen Klopp ikeneye amanota aatandatu gusa ubundi ikegukana shampiyona nyuma y’imyaka 30.

Arsenal yagumye ku mwanya wa cyenda n’amanota 40 mu gihe hasigaye imikino 10 kandi ishaka kuza mu makipe ane ya mbere kugira ngo izakine UEFA Champions League.

Mu mukino wabimburiye 92 yari isigaye kugira ngo Premier League isozwe, Aston Villa yanganyije na Sheffield United ubusa ku busa.

Sheffield United yakabaye yahawe igitego ku munota wa 42 ubwo umunyezamu Orjan Nyland yafatiraga umupira wa Oliver Norwood hejuru y’umurongo.

Umusifuzi Michael Olivier ntiyigeze amenyeshwa ko ari igitego ndetse ikoranabuhanga rya Goal-line Technologoy ryerekana ko umupira warenze umurongo ntiryabashije kubyerekana kuko abakinnyi bahakingirije.

Sosiyete ya Hawk-Eye irikoresha, yasabye imbabazi ikipe ya Sheffield United, ivuga ko ari ubwa mbere iri kosa ribayeho mu mikino isaga 9000 imaze gukoreshwaho iri koranabuhanga.

Ishyirahamwe ry’Abasifuzi ba Premier League (PGMOL) ryavuze ko hatari kwitabazwa ikoranabuhanga rya VAR kandi umusifuzi atigeze amenyeshwa ko umupira ushobora kuba warenze umurongo.

Premier League izakomeza guhera ku wa Gatanu, ubwo Manchester United izaba yakiriwe na Tottenham mu mukino w’umunsi wa 30.