Urinda Perezida Salva Kiir yagaragaye yambaye ikote ricitse mu irahira rya Museveni

Ku mbuga nkoranyambaga hakomeje kuvugisha benshi ku ifoto y’umusirikare ushinzwe umutekano wa Perezida wa Sudani y’Epfo, Salva Kiir Mayardit, witwa Alor Machol Lual, wagaragaye yambaye ikote ry’ikositimu ryacitse cyane ubwo yari ari kumwe n’umukuru w’igihugu mu muhango wo kurahira kwa Perezida wa Uganda, Yoweri Kaguta Museveni.

Uyu muhango wabereye ku Kibuga cy’Independence Grounds i Kololo, mu murwa mukuru Kampala, aho abayobozi batandukanye bo mu karere bari bitabiriye.

Ifoto yakwirakwiye ku mbuga nkoranyambaga

Ifoto y’uyu musirikare yagaragaye ku mbuga nkoranyambaga zitandukanye, igaragaza ikote rye ryacitse inyuma, ariko we akomeza gukora inshingano ze zo guherekeza Perezida Salva Kiir, amufasha kugera aho yari yicaye.

Ibi byatumye abantu benshi batangira gutanga ibitekerezo, bamwe bavuga ko uyu musirikare yashyize imbere akazi ke kurusha uko yitwara mu myambaro, ibintu bamwe bise ubunyamwuga n’ubwitange budasanzwe.

Abamushimagiza bavuga ko yagaragaje ubunyamwuga

Bamwe mu bakoresha imbuga nkoranyambaga bagaragaje ko Alor Machol Lual ari urugero rw’abantu bashyira imbere inshingano, bavuga ko kuba ikote ryacitse bitamubujije kwitwararika umutekano w’umukuru w’igihugu.

Hari abavuze ko ibyo yakoze bigaragaza ko mu kazi ko kurinda umukuru w’igihugu, ikintu cya mbere ari ugukomeza kuba maso no kwitonda, aho kwita ku isuku y’umwambaro mu gihe cy’akazi.

Abandi bibajije icyaba cyaratumye ikote ricika gutyo

Ku rundi ruhande, hari abandi bibajije impamvu ikote ry’uyu musirikare ryaba ryacitse ku buryo bukabije, bamwe bakeka ko byaba byatewe n’uko yaba yarahuye n’ikibazo cyihutirwa mu kazi ke, cyangwa se ko byaba byaratewe n’impanuka yabaye mbere y’uko agera muri uwo muhango.

Nubwo abantu batandukanye bakomeje kubivugaho, ntacyo ubuyobozi bwa Sudani y’Epfo cyangwa ubuyobozi bumurinda buratangaza ku cyateye uko kwangirika kw’imyambaro ye.

Inkuru yahise iba kimomo ku mbuga nkoranyambaga

Iki gikorwa cyatumye izina rya Alor Machol Lual rikorwa cyane ku mbuga zitandukanye zirimo Facebook, X (Twitter), TikTok n’izindi, aho abantu bakomeje kuganira ku kuba yarakomeje gukora inshingano ze nubwo imyambaro ye itari imeze neza.

Bamwe bavuga ko ari isomo ku bantu benshi bakunda guha agaciro isura n’imyambarire, nyamara mu kazi hari aho icy’ingenzi ari ugusohoza inshingano.

Nubwo ikote ryacitse ryabaye intandaro yo kuvugisha benshi, icyagaragaye cyane ni uko uyu musirikare yakomeje guherekeza Perezida Salva Kiir mu buryo bugaragaza ko umutekano ari wo wa mbere, ibintu byatumye benshi bamufata nk’umuntu witanze kandi wubaha inshingano. Nubwo hari abamunenga bakibaza impamvu yambaye umwenda ucitse Kandi arinda umukuru w’igihugu.