Dore ibyo Ingabire Victoire watawe muri yombi akurikiranyweho

Kigali – Urwego rw’Igihugu rw’Ubugenzacyaha (RIB) rwatangaje ko rwataye muri yombi Ingabire Umuhoza Victoire, ukurikiranyweho ibyaha bifitanye isano n’umugambi wo guhungabanya umutekano w’igihugu. Aregwa kuba yaragize uruhare mu gushishikariza abantu kwitabira amahugurwa agenewe guhungabanya ubutegetsi, binyuze mu gitabo cyitwa Blueprint for Revolution, ndetse no gukorana n’abandi bantu icyenda bakurikiranyweho ibyaha bifitanye isano n’imitwe y’iterabwoba.

RIB yatangaje ko Ingabire Victoire afungiwe kuri Sitasiyo ya Remera kuva ku wa 19 Kamena 2025, mu gihe ategereje gushyikirizwa Ubushinjacyaha.

Amahururwa ashingiye ku gitabo Blueprint for Revolution

Ubushinjacyaha buvuga ko kuva mu mwaka wa 2021, hari itsinda ry’abantu icyenda ryatangiye gukora amahugurwa agenewe urubyiruko, rubigisha uburyo bwo guhirika ubutegetsi hakoreshejwe uburyo butari ubwa gisirikare. Ayo mahugurwa yakururwaga n’inyigisho ziri mu gitabo Blueprint for Revolution cyanditswe na Srdja Popović, aho kigisha uburyo bwo guteza impinduka binyuze mu myigaragambyo, igitutu cya rubanda, n’ibikorwa byo kwigomeka ku nzego z’ubuyobozi.

Ayo mahugurwa ngo yakozwe mu ibanga, yitabirwa n’abantu batandukanye, harimo abanyapolitiki, abanyamakuru n’urubyiruko, aho bigishwaga uko bagombye gukoresha imbuga nkoranyambaga, ibiganiro by’ibanga, n’imyigaragambyo itagaragara nk’iyitwaje intwaro, ariko igamije kuvangira ubuyobozi bwemewe n’amategeko.

Nsengimana Théoneste na Sibomana Sylvain bashinjwa kugira uruhare rukomeye

Mu bafashwe mbere, harimo Sibomana Sylvain, ushinjwa kuba ari we wakoraga amahugurwa ku giti cye, akaba yaranatangaga inyandiko n’ibimenyetso bifatika ku buryo bwo gutegura ibikorwa by’imyigaragambyo ya politiki.

Undi ni Nsengimana Théoneste, umunyamakuru wa YouTube uzwi cyane ku mbuga nkoranyambaga, ubushinjacyaha bumushinja kwamamaza ibyo bitekerezo no kubisangiza rubanda, atitaye ku ngaruka bishobora kugira ku mutekano w’igihugu.

Ingabire Victoire yitabye urukiko muri iki cyumweru

Muri iki cyumweru, Ingabire Victoire yitabye urukiko aho yireguye ku byaha ashinjwa. Yavuze ko adafite aho ahuriye n’iyo gahunda y’amahugurwa, avuga ko atari yarigeze ayitegura cyangwa ngo ayitere inkunga. Avuga ko ibyo ashinjwa bishingiye ku mpamvu za politiki, ndetse ko abifata nk’igeragezwa ryo kumucecekesha.

Ubushinjacyaha bwagaragaje ibimenyetso bubona bihagije byo kuba yari azi gahunda z’ayo mahugurwa, ndetse ngo hakaba hari ubutumwa bugufi (SMS), inyandiko zanditse n’amajwi bifitwe n’inzego z’umutekano, bigaragaza ko yagiye agira uruhare mu gukangurira bamwe kwitabira ayo mahugurwa.

Yigeze gufungwa, aza kurekurwa ku mbabazi za Perezida Kagame

Ingabire Victoire si ubwa mbere atabwa muri yombi. Yari yarakatiwe gufungwa imyaka 15 n’inkiko zo mu Rwanda mu mwaka wa 2012, nyuma yo guhamwa n’ibyaha birimo guhakana Jenoside yakorewe Abatutsi no gukwirakwiza ibitekerezo bihungabanya umutekano w’igihugu. Nyuma y’imyaka umunani ari muri gereza, yaje kurekurwa mu 2018 ku mbabazi zatanzwe n’Umukuru w’Igihugu, Perezida Paul Kagame, nk’uko biteganywa n’Itegeko Nshinga.

Nyuma yo kurekurwa, Ingabire Victoire yakomeje ibikorwa bya politiki abinyujije mu ishyaka DALFA-Umurinzi, ritaremerwa n’amategeko mu Rwanda, riharanira impinduka zishingiye ku mahoro, nk’uko abyivugira. Gusa, inzego z’ubutabera zivuga ko ibimenyetso bigaragaza ko ibikorwa bye bya vuba bitandukanye cyane n’iyo ntero y’amahoro.

Urwego rw’ubutabera rurakomeza iperereza

RIB yatangaje ko iperereza rikomeje, kandi ko Dosiye ye izashyikirizwa Ubushinjacyaha mu minsi ya vuba.