Rwanda: Undi muntu yishwe na Coronavirus,abanduye bariyongera cyane
Minisiteri y’Ubuzima iratangaza ko kuri iki Cyumweru tariki 23 Kanama 2020, mu Rwanda habonetse abantu bashya 200 banduye icyorezo cya COVID-19, n’undi muntu umwe wishwe na yo. Uwapfuye ni umubyeyi w’imyaka 71.
Uyu ni wo mubare munini w’abanduye iki cyorezo ugaragaye ku munsi umwe, kuva Covid-19 yagera mu Rwanda tariki ya 14 Werurwe 2020.
Abo barwayi bashya 200 barimo 164 babonetse i Kigali (bapimwe mu masoko ya Kigali), 29 babonetse i Rusizi (bapimwe mu bibasiwe kurusha abandi), batanu babonetse muri Rubavu n’abandi babiri babonetse muri Huye.
Muri rusange kugeza kuri iki cyumweru, abamaze kwandura icyo cyorezo ni 3,089 muri bo abamaze gukira ni 1,755 barimo umwe wakize kuri iki Cyumweru, naho abakivurwa ni 1,322.
Abamaze kwicwa n’icyo cyorezo bose hamwe mu Rwanda ni cumi na babiri, barimo umwe wapfuye kuri iki Cyumweru.
Minisiteri y’Ubuzima isaba Abaturarwanda bose gukomeza kwitwararika bubahiriza amabwiriza yo kwirinda ikwirakwira ry’icyorezo cya COVID-19.
