Burundi: Umudamu wa Perezida Nkurunziza yanduye Coronavirus
Denise Bucumi Nkurunziza, umugore wa Perezida Pierre Nkurunziza arwariye mu Bitaro bya Aga Khan University mu mujyi wa Nairobi nyuma yuko yanduye Coronavirus.
Amakuru yizewe dukesha Citizen TV avuga ko Madamu Nkurunziza, yatwawe mu ndege igitaraganya muri Kenya avuye i Burundi kuri uyu wa Kane mu gitondo.
Kugeza ubu ntiharamenyekana uburyo amerewe mu bitaro.
Umugabo we, Pierre Nkurunziza ntago yajyanye nawe gusa amakuru avuga ko yajyanye n’abarinzi be batatu harimo umwe nawe wanduye.
Ntiharamenyekana uburyo yemerewe kwinjira muri Kenya kandi Abanduye Coronavirus batemerewe kuhakandagira.
Madamu Denise yanduye Coronavirus nyuma yuko Perezida Nkurunziza yagiye ashinjwa gukerensa iki cyorezo.
Byitezwe ko Perezida Nkurunziza agomba gusigira ubutegetsi Evarste Ndayishimiye uherutse gutsinda amatora y’umukuru w’igihugu, gusa abarwanya ubutegetsi mu Burundi barangajwe imbere na Agathon Rwasa bavuga ko nta mpinduka zitezwe muri politike y’iki gihugu .
BIZIMANA Desire/Igicumbi News
