Amakuru mashya: Urukiko rufashe umwanzuro ku rubanza rw’umunyamakuru Ndahiro Valens Papy
Urubanza rw’ubujurire ruregwamo umunyamakuru Ndambendore Valens, uzwi nka Ndahiro Valens Papy, rwashyizwe mu buhuza nyuma y’uko impande zombi zemeranyije gushaka umuti w’ikibazo binyuze muri ubwo buryo, aho gukomeza inzira isanzwe y’iburanisha.
Iki cyemezo cyafashwe kuri uyu wa Mbere, tariki ya 26 Ukwakira 2026, mu rubanza rurebana n’ibirego by’Ubushinjacyaha ku byaha birimo gutukana mu ruhame no gukwirakwiza amakuru y’ibihuha.
Uru rubanza rwari mu Rukiko Rwisumbuye rwa Nyarugenge, aho Ubushinjacyaha bwajuririye umwanzuro w’Urukiko rw’Ibanze rwari rwaragize Ndahiro Valens Papy umwere ku byaha yari akurikiranyweho.
Iyi dosiye ifitanye isano n’inkuru umunyamakuru Ndahiro yakoze mu mwaka wa 2024, ikanyura kuri BTN TV, ivuga ku kibazo cy’abaturage bo mu Murenge wa Muhima, mu Karere ka Nyarugenge, bari bagaragaje impungenge z’ibikorwa byo gusiza ikibanza.
Muri iyo nkuru, abaturage bavugaga ko ibyo bikorwa byagize ingaruka ku nzira bakoreshaga ndetse n’umutekano w’inzu zabo. Ikibazo cyaje gukurikiranwa mu biganiro byanyuze kuri televiziyo, aho Ndahiro yitabiriye bimwe muri byo asobanura amakuru yari yarakusanyije.
Nyuma y’ibyo, umushoramari Ndayisenga Matherne yatanze ikirego ku birebana n’amagambo yavuzwe n’amakuru yatangajwe muri iyo nkuru no mu biganiro byakurikiyeho.
Ku wa 12 Kamena 2026, Urukiko rw’Ibanze rwari rwaragize Ndahiro Valens Papy umwere, rugaragaza ko ibirego byari byatanzwe bitari bifite ishingiro rihagije ryo kumuhamya ibyaha yashinjwaga.
Ubushinjacyaha ntibwemeranyije n’uwo mwanzuro, buhitamo kujuririra icyemezo cy’urukiko kugira ngo dosiye isuzumwe mu rwego rw’ubujurire.
Iburanisha ryari riteganyijwe ku wa 14 Ukwakira 2026 ryarasubitswe, nyuma y’uko hagaragaye ikibazo cy’uko umunyamategeko wunganira Ndahiro atashoboye kwitabira iburanisha kubera uburwayi.
Urukiko rwari rwashyizeho tariki ya 26 Ukwakira 2026 kugira ngo urubanza rukomeze. Icyakora, kuri iyo tariki, impande zombi zumvikanye kwifashisha ubuhuza.
Gushyira urubanza mu buhuza bigaragaza ko ababuranyi bahisemo kugerageza gukemura amakimbirane binyuze mu biganiro, aho gukomeza inzira y’iburanisha isanzwe.
Mu buhuza bwabaye ku wa 26 Ukwakira 2026, buyobowe na Perezida w’Urukiko Rwisumbuye rwa Nyarugenge, umunyamakuru Ndambendore Valens, uzwi nka Ndahiro Valens Papy, n’umushoramari Ndayisenga Matherne wari wamureze, bumvikanye ku buryo bwo gukemura amakimbirane yari hagati yabo.
Umunyamategeko wunganira Ndahiro yatangaje ko impande zombi zasabanye imbabazi, anavuga ko urubanza rutagikomeje. Yirinze kugira ibindi bisobanuro atanga kuri ubwo bwumvikane.
