Loni yongeye kuvugurura urutonde rw’ibihano, FRN ya Joseph Kabila ishyirwa mu mazina ya AFC

Iri vugurura risobanuye ko FRN, umutwe wa politiki n’igisirikare uyobowe n’uwahoze ari Perezida wa Repubulika Iharanira Demokarasi ya Congo, Joseph Kabila, uzajya ubarwa nk’irindi zina rya AFC mu nyandiko z’Umuryango w’Abibumbye zirebana n’ibihano.

Mu itangazo rifite nimero SC/16506, iyo komite yasobanuye ko yahinduye amakuru yanditse kuri AFC ku mwanya wa CDe.010, kugira ngo hongerwemo izina rya FRN mu mazina y’inyongera y’uyu mutwe.

Nubwo iryo zina rishya ryashyizwe kuri dosiye ya AFC, itariki uyu mutwe wafatiweho ibihano ntiyahindutse, kuko ikiri ku wa 14 Nyakanga 2026.

Ibi bituma ibihugu bigize Umuryango w’Abibumbye bikomeza gukoresha amazina yombi mu gushyira mu bikorwa ingamba z’ibihano byafatiwe uwo mutwe, zirimo gufatira imitungo n’amafaranga ndetse no kuwubuza kugura intwaro.

Kinshasa yishimiye icyemezo cya Loni

Guverinoma ya Repubulika Iharanira Demokarasi ya Congo yakiriye neza iri vugurura, ivuga ko yari imaze kugeza ku Muryango w’Abibumbye ubusabe bwayo bwemewe bwo kongera gusobanura isano iri hagati ya AFC na FRN, hagamijwe ko ibihano byariho bitazaburizwamo no guhindura izina.

Minisitiri w’Ububanyi n’Amahanga wa Congo, Thérèse Kayikwamba Wagner, yagaragaje igitekerezo cye kuri X, aho yavuze ko nubwo amazina ashobora guhinduka, icyo yise ishingiro ry’iyo mitwe ridahinduka.

Yagize ati: “AFC/M23 cyangwa FRN, ni kimwe n’ikindi.”

Muri urwo rwego, Corneille Nangaa, ugaragazwa na Loni nk’umuyobozi wa AFC, na Sultani Makenga uyobora ibikorwa bya gisirikare bya M23, na bo basanzwe bari ku rutonde rw’abantu bafatiwe ibihano kuva ku wa 14 Nyakanga 2026.

Joseph Kabila na we afite ibihano byashyizweho na Minisiteri y’Imari ya Leta Zunze Ubumwe za Amerika kuva ku wa 30 Mata 2026.

Imirwano yo muri Kivu y’Amajyepfo yasize ibihumbi bivuye mu byabo

Iri vugurura rya Loni rije mu gihe mu ntara ya Kivu y’Amajyepfo muri Congo hakomeje kugaragara imirwano ifitanye isano n’ibikorwa bya FRN.

Amakuru yatangajwe na Radio France Internationale (RFI), ishingiye ku masoko yo mu gisirikare cya Congo, avuga ko abarwanyi b’uyu mutwe bafashe uduce dutandukanye two mu gace ka Bunyakiri, turimo Bitale na Bulambika.

Imirwano yabereye mu bice bya Kalehe na Kabare yagize ingaruka ku baturage, aho ibihumbi amagana byabaye ngombwa ko bava mu byabo bashaka ahantu hatekanye.

Raporo y’ibanze y’ibiro by’Umuryango w’Abibumbye bishinzwe ibikorwa by’ubutabazi, yasohotse ku wa 11 Ugushyingo 2026, igaragaza ko abantu barenga 323.000 bavuye mu byabo hagati ya tariki ya 6 n’iya 9 Ugushyingo, kubera imirwano yakomeje muri ibyo bice.

Uretse kwimura abaturage, umutekano muke n’ingorane zo kugera mu duce twibasiwe n’imirwano byatumye ibikorwa bimwe by’ubutabazi bihagarikwa by’agateganyo.

Ibi bibaye mu gihe ikibazo cy’umutekano mu burasirazuba bwa Repubulika Iharanira Demokarasi ya Congo gikomeje kuba imbogamizi ku mihate yo kugarura amahoro, mu gihe ibihugu n’imiryango mpuzamahanga bikomeje gushaka inzira zo gushyira mu bikorwa amasezerano n’ingamba bigamije guhagarika imirwano.