Ubwongereza bugiye gutanga drones, indege z’intambara n’ubwato mu kurinda umuhora wa Hormuz
Leta y’u Bwongereza yatangaje ko igiye gutanga drones, indege z’intambara hamwe n’ubwato bw’intambara, mu gikorwa mpuzamahanga gihuriweho n’ibihugu byinshi kigamije kurinda umutekano w’ubwato buca mu muhora wa Hormuz, imwe mu nzira z’ingenzi zikoreshwa mu gutwara ibikomoka kuri peteroli ku Isi.
Ibi byatangajwe ku wa kabiri na Minisitiri w’u Bwongereza ushinzwe ingabo, John Healey, mu nama y’abaminisitiri b’ingabo yabaye hifashishijwe ikoranabuhanga rya internet (inama yo kuri murandasi), ihuza abashinzwe umutekano n’ingabo b’ibihugu bitandukanye.
Ibikoresho bya gisirikare bizifashishwa
John Healey yavuze ko uwo mushinga uzifashisha ikoranabuhanga rigezweho mu gushakisha no gukuraho ibisasu bishyirwa mu mazi, hifashishijwe ubwato butagira abapilote (unmanned vessels) ndetse n’indege z’intambara zo mu bwoko bwa Typhoon, zizajya zihora zigenzura ikirere.
Yasobanuye ko intego ari uguhagarika ibikorwa byose byahungabanya umutekano w’ubwato butwara ibicuruzwa n’ibikomoka kuri peteroli bicisha muri uwo muhora.
Ibihugu birenga 40 biri muri icyo gikorwa
Uyu mushinga uvugwa, uhuriyemo ibihugu birenga 40, kandi Healey yavuze ko uzatangira igihe ibintu bizaba byongeye gutuza, hagarutse ituze mu karere.
Umuhora wa Hormuz ni umwe mu mihora y’amazi ikoreshwa cyane ku Isi mu kunyuzamo ubwato butwara ibikomoka kuri peteroli na gaz. Ni inzira ihuza Inyanja ya Persian Gulf n’Inyanja ya Oman.
Iran ishinjwa gukoresha Hormuz mu kwihorera
Hashize amezi Iran ikomeza kugaragaza ubushake bwo kugenzura uyu muhora wa Hormuz nk’uburyo bwo kwihorera ku bitero byagiye bigabwa n’Amerika ndetse na Israel.
Ku ruhande rwa Leta Zunze Ubumwe za Amerika, yo yafashe icyemezo cyo gufunga bimwe mu byambu bya Iran, igamije gushyira igitutu kuri Tehran ngo yemere ibyo isabwa mu biganiro mpuzamahanga, ibintu byarakaje cyane ubuyobozi bwa Iran.
Ibice 20% by’ibitoro ku Isi bicishwa muri Hormuz
Abasesenguzi bavuga ko hafi 20% by’ibitoro na gaz bikoreshwa ku Isi bicishwa muri uwo muhora wa Hormuz. Ibyo bituma gufungwa k’uwo muhora cyangwa umutekano mucye uhari bihita bigira ingaruka ku bukungu bw’Isi.
Mu minsi ishize, ubwoba bw’uko Hormuz yakwugarwa bwatumye ibiciro by’ibitoro bizamuka ku rwego mpuzamahanga.
Trump avuga ko agahenge kari hafi gusenyuka
Nubwo kuva muri Mata (4) habaye agahenge mu makimbirane hagati ya Amerika na Iran, Perezida wa Amerika Donald Trump aherutse gutangaza ko ako gahenge “kari hafi gusenyuka.”
Impande zombi zakomeje gushinjanya kugaba ibitero no guteza umutekano muke mu mazi yo muri uwo muhora wa Hormuz, ibintu bikomeje gutera impungenge ku mutekano w’ubucuruzi mpuzamahanga.
