AFC/M23 irashinja ubutegetsi bwa Kinshasa kurenga ku masezerano y’agahenge no kwica abaturage
Ihuriro rya politiki n’igisirikare Alliance Fleuve Congo (AFC) rifatanyije n’umutwe urishamikiye wa Mouvement du 23 Mars (M23) ryatangaje ko rihangayikishijwe bikomeye n’ibikorwa rivuga ko ari ubwicanyi bukomeje gukorerwa abaturage b’abasivili mu bice bitandukanye byo mu burasirazuba bwa Repubulika Iharanira Demokarasi ya Congo.
Mu itangazo ryashyizwe ahagaragara ku wa 19 Gashyantare 2026, iri huriro ryagaragaje ko mu duce twa Minembwe, Mikenge na Karingi ndetse no mu bindi bice bya Kivu y’amajyepfo, hakomeje kuba ubwicanyi bwibasira abaturage, bushinjwa ihuriro ry’ingabo ririmo FARDC, FDLR, Wazalendo n’abacanshuro b’abanyamahanga.
AFC/M23 ivuga ko ibikorwa nk’ibi bikomeje kuba mu gihe amahanga acecetse, ibintu ivuga ko bituma habaho impungenge ku bushake mpuzamahanga bwo gushakira amahoro igihugu cya Repubulika iharanira Demokarasi ya Congo. Iri huriro rishimangira ko ibitero bivugwa bikorerwa abagore, abana n’abageze mu zabukuru, kandi ko bishobora gufatwa nk’ibyaha bikomeye byo kurenga ku mategeko mpuzamahanga arengera abasivili mu gihe cy’intambara.
Mu itangazo ryaryo, AFC/M23 yanenze kandi ko ibikorwa by’ubutabazi n’imiryango iharanira uburenganzira bwa muntu bitagize icyo bitangaza ku buryo bugaragara, ibintu ivuga ko bigaragaza uburangare budakwiye ku bibazo by’ubutabazi biri mu karere k’Ibiyaga Bigari.
Iri huriro ryongeye gushinja ubutegetsi bwa Kinshasa kuba nyirabayazana w’ihungabana ry’umutekano mu karere, rivuga ko politiki yabwo ishobora guteza ingaruka zikomeye ku mutekano w’akarere kose.
AFC/M23 ivuga kandi ko ibikorwa by’imirwano bivugwa ari ukurenga ku masezerano y’agahenge yashyiriweho umukono mu biganiro byabereye i Doha n’i Washington. Iri huriro rishinja ubutegetsi bwa Congo kutubahiriza ijambo ryabwo no kudaha agaciro inzira y’ibiganiro bya dipolomasi, ibintu rivuga ko bishobora kubangamira amahirwe y’amahoro arambye.
Iri tangazo ryashyizweho umukono n’Umuvugizi wa AFC/M23, Lawrence Kanyuka, rikaba ryatangarijwe mu mujyi wa Goma.
AFC/M23 isoza ivuga ko gukomeza guceceka ku byaha bikomeye bishobora kuzabazwa abazabigiramo uruhare bose, yaba ku rwego rwa politiki cyangwa ku rwego rw’imyitwarire, mu gihe amateka azasaba ibisobanuro.
