Umuherwe wafashwe amashusho mu gitaramo yagwatiriye inshoreke ye ari mu mazi abira
Boston, USA – Andy Byron, Umuyobozi Mukuru wa sosiyete y’ikoranabuhanga Astronomer, ari mu kibazo gikomeye nyuma y’uko amashusho yafashwe muri concert ya Coldplay amugaragaza ari kumwe n’umukozi basanzwe bakorana, Kristin Cabot, bisigaye bivugwa ko bashobora kuba bafitanye umubano udasanzwe.
Amashusho yafashwe na”kamera y’urukundo” izwi nka kiss cam, ubwo iyi concert yabaga ku kibuga cya Gillette Stadium muri Leta ya Massachusetts, yagaragaje Byron na Kristin begeranye cyane bagwatiranye, bagaragaza imvugo y’umubiri isa n’iy’abantu bari mu rukundo. Uburyo bagize ubwoba ubwo berekwaga kuri ecran nini, bitandukanye n’uko abantu benshi bari bategereje ko basomana nk’uko bisanzwe bikorwa muri iyo gahunda, byarushijeho gutuma hibazwa byinshi.
Ibyatangajwe na Andy Byron n’umuryango we
Nyuma yo kumenyekana kw’aya mashusho, Andy Byron yanditse ibaruwa asaba imbabazi. Mu butumwa bwe, yemeye ko ibyo yakoze byari “gutenguha” umuryango we n’abantu bari bamutegerejeho indangagaciro z’ubuyobozi. Nubwo atigeze yemeza ko afite umubano wihariye na Kristin, yemeye ko yari imyitwarire itari ikwiye ku muntu uri mu buyobozi bwa sosiyete nk’iyo.
Mu gihe gito nyuma y’ibi, Megan Kerrigan Byron, umugore wa Andy Byron, yakuyeho izina rye ry’umugabo ku mbuga nkoranyambaga, harimo na Facebook, ndetse aza no guhagarika konti ze zombi. Ibi byateye impaka ku mbuga nkoranyambaga, bamwe batangira kwemeza ko urugo rwabo rushobora kuba ruri gusenyuka.
Imyitwarire ya Kristin Cabot n’ibitekerezo bitandukanye ku mbuga nkoranyambaga
Kristin Cabot, usanzwe ari Umuyobozi ushinzwe abakozi muri Astronomer, ntiyigeze asohora itangazo ryemewe cyangwa asubiza ibivugwa ku mugaragaro. Amakuru make amwerekeyeho agaragaza ko yigeze gushakana n’undi mugabo ndetse afite umwana umwe.
Abantu batandukanye ku mbuga nkoranyambaga bagize icyo bavuga kuri ibi bibazo. Bamwe bagaragaje impuhwe kuri Megan Byron, bamushimira ko yahisemo gutuza no guhagarara bwuma, abandi banenga cyane imyitwarire ya Andy Byron, bavuga ko atubashye inshingano ze zo kuba umugabo n’umuyobozi.
Abantu bazwi bavuze iki?
Bamwe mu bantu bazwi bagize icyo bavuga kuri iki kibazo. Umunyamakuru w’imyidagaduro Chrissy Teigen na Bethenny Frankel bagaragaje ko bababajwe n’ibibaye kuri Megan Byron, ndetse batangaza ko ari urugero rw’akarengane gakorerwa abagore bashyingiwe ariko bagatenguha mu ruhame. Undi munyamerika wakurikiranye iyi concert, Grace Springer, yavuze ko ibintu nk’ibi bikwiye kuba isomo ku bayobozi bahindura inshingano z’akazi ibyifuzo byabo bwite.
Akarusho k’iyi nkuru: Ibibazo bivugwa muri Astronomer
Iyi nkuru ije mu gihe hari hashize igihe hari amakuru avuga ko Andy Byron atari umuyobozi mwiza imbere mu kigo. Bamwe mu bakozi ba Astronomer bagiye bagaragaza ko hari ibibazo by’imyitwarire mu kazi, harimo kubangamira abakozi, kubatoteza mu buryo bwo kubagabanyiriza ubushobozi, no kubashyiraho igitutu gishingiye ku musaruro. Abigeze gukorana na we bavuze ko ibyamubayeho bishobora kuba ari igisubizo cy’ibibazo byari byaramunaniye gukemura imbere mu kigo.
Astronomer, ikigo gitanga serivisi mu bijyanye n’isesengura ry’ibipimo bya mudasobwa (data observability), cyabonye inkunga igera kuri miliyoni 93 z’amadolari ya Amerika, kikaba cyarashyizwe ku rutonde rw’ibigo bifite agaciro kari hejuru ya miliyari imwe y’amadolari. Hari impungenge ko imyitwarire y’umuyobozi wayo ishobora kugira ingaruka ku isura y’iki kigo ku isoko mpuzamahanga.
Ubutumwa bw’ingenzi
Ibibaye kuri Andy Byron ni isomo rikomeye ku bayobozi mu nzego zinyuranye, cyane cyane mu bigo by’abikorera. Iyo umuntu ari mu mwanya w’icyizere n’ubuyobozi, ingeso ze ziba zibereye rubanda. Uburyo yitwaye muri concert, n’ingaruka byagize ku muryango we, bitanga ishusho y’uko ibyemezo bimwe bishobora gusenya ibyo umuntu yubatse imyaka myinshi.
Inkuru ya Igicumbi News
