Uganda: Maj. Gen. Deus Sande yitabye Imana ajya gushyingura Maj. Gen. Francis Takirwa

Majoro Jenerali Deus Sande, wari Umugaba w’Ingabo za Uganda zishinzwe ibirwanisho biremereye (Armored Division) zikorera mu gace ka Masaka, yitabye Imana mu rukerera rwo kuri uyu munsi ahagana saa cyenda n’iminota 45 za mu gitondo (3:45 a.m.), azize ibibazo byo guhumeka byamufashe bitunguranye.

Amakuru aturuka mu nzego za gisirikare muri Uganda agaragaza ko uyu musirikare mukuru yari mu rugendo yerekeza i Kampala, aho yagombaga kwitabira umuhango wo gushyingura Maj. Gen. Francis Takirwa, na we witabye Imana mu minsi ishize.

Televiziyo ya NTV Uganda ivuga ko Maj. Gen. Sande yafashwe n’ibibazo bikomeye byo guhumeka ageze mu karere ka Mpigi, kari hagati y’Umujyi wa Masaka na Kampala. Abari kumwe na we bahise bamujyana kwa muganga byihuse kugira ngo ahabwe ubutabazi bw’ibanze.

Nubwo abaganga bakoze ibishoboka byose ngo bamugarure mu buzima, ntibyashobotse ko akira, atangazwa ko yitabye Imana mu masaha ya kare y’igitondo.

Urupfu rwe ruje rukurikira urw’undi musirikare mukuru, Maj. Gen. Francis Takirwa, wari ugiye gushyingurwa uyu munsi.

Jenerali Majoro Francis Takirwa, umwe mu basirikare bakuru b’Ingabo za Uganda (UPDF), yitabye Imana nyuma y’igihe gito arwaye, nk’uko byatangajwe n’inzego za gisirikare.

Amakuru yemejwe n’Igisirikare cya Uganda agaragaza ko Maj. Gen. Takirwa yari amaze iminsi ahabwa ubuvuzi kubera uburwayi butatangajwe ku mugaragaro mu buryo burambuye. Yaje kwitaba Imana mu bitaro, aho yari ari gukurikiranwa n’abaganga.

Maj. Gen. Takirwa yari azwi nk’umusirikare umaze igihe kinini mu ngabo, wagize uruhare mu bikorwa bitandukanye birimo gucunga umutekano w’igihugu ndetse no mu butumwa bw’ingabo hanze y’igihugu.

Mu buzima bwe bwa gisirikare, yakoze imirimo inyuranye irimo kuyobora ingabo mu bice bitandukanye bya Uganda, ndetse anagira uruhare mu mahugurwa no mu itegurwa ry’ingabo zifite ubushobozi bwo guhangana n’ibibazo by’umutekano.

Urupfu rwe rwabanje gutangazwa n’ubuyobozi bwa UPDF, buvuga ko igihugu kibuze umwe mu basirikare b’inararibonye kandi witanze mu mirimo y’uburinzi bw’igihugu.

Urupfu rwa Maj. Gen. Takirwa rwakurikiwe n’amarira n’ubutumwa bwo kumwihanganisha bwatanzwe n’abasirikare bakuru, abo bakoranye na we ndetse n’inshuti n’umuryango we. Yashimiwe ubwitange, imyitwarire myiza n’uruhare yagize mu kubaka igisirikare gifite ubushobozi.

Mu gihe yari agiye gushyingurwa, ni bwo Maj. Gen. Deus Sande na we yafashwe n’uburwayi bukomeye mu nzira ajya gutanga icyubahiro cya nyuma kuri mugenzi we, na we aza kwitaba Imana.

Ibi byateye benshi kwibaza ku cyuho gikomeye izi mpfu ebyiri zisize mu Ngabo za Uganda, cyane ko zari zigizwe n’abayobozi bafite inshingano zikomeye mu nzego zitandukanye.

Kugeza ubu, Igisirikare cya Uganda kirateganya gutangaza ku mugaragaro gahunda irambuye yo gusezera kuri aba basirikare bombi mu cyubahiro gihabwa abatanze umusanzu mu kurinda igihugu.

Imiryango yabo, inshuti n’abo bakoranye na bo bakomeje kwakira inkuru y’akababaro mu bihe bitoroshye.