Uganda: Ishuri ryagwiriye Abanyeshuri babiri barapfa, abandi batatu barakomereka bikomeye
Abanyeshuri babiri bigaga mu mwaka wa mbere w’amashuri abanza bapfuye, mu gihe abandi batatu bakomeretse bikomeye, nyuma y’uko icyumba cy’ishuri kibagwiriye mu gihe cy’imvura nyinshi ivanze n’umuyaga muri Uganda.
Iyi mpanuka yabereye ku ishuri ribanza rya Runyinya Primary School, riherereye mu gace ka Kigarama, mu Karere ka Sheema.
Amakuru avuga ko icyo cyumba cy’ishuri cyasenyutse mu gihe muri ako gace hari umuyaga ukomeye n’imvura nyinshi, bituma abana bari imbere bagwirwa n’ibice by’inyubako.
Abanyeshuri babiri bahise bahasiga ubuzima. Abapfuye bamenyekanye ni Joseph Musasizi na Ayesigye Griphine.
Abandi banyeshuri batatu bakomeretse bikomeye, bahita bajyanwa kwitabwaho n’abaganga.
Umuyobozi wungirije uhagarariye Guverinoma muri Sheema, Sam Orikunda, yavuze ko ibyabaye ari ibyago bikomeye kandi ashyikiriza imiryango y’ababuze ababo ubutumwa bwo kubihanganisha.
Yavuze ko inzego zibishinzwe zatangiye iperereza rigamije kumenya neza icyateye iryo shuri gusenyuka, ndetse no gusuzuma niba hari ibindi byangiritse byatewe n’iyo mvura n’umuyaga.
Iyi mpanuka yongeye guteza impungenge ku mutekano w’inyubako z’amashuri, cyane cyane mu gihe cy’imvura nyinshi n’imiyaga ikomeye.
Ababyeyi, abarimu ndetse n’abaturage bo mu gace ka Kigarama bakomeje gukurikirana amakuru ajyanye n’abakomeretse, mu gihe inzego z’ubuyobozi n’iz’umutekano zikomeje ibikorwa byo gusuzuma ibyabaye.
