Burundi: Ubuyobozi bumaze gusenya ingo 136 z’abagabo babana n’amahabara
Kugeza kuri uyu wa Gatandatu Tariki 30 Werurwe 2024, ingo zigera ku 136 z’abagabo babana n’amahabara zari zimaze gusenywa muri komine Kayanza mu gihugu cy’u Burundi mu rwego rwo kurwanya ubuharike.
Mu duce 11 muri Kayanza niho abagore 136 basohowe mu ngo, ahitwa Musave hasohowe 78 ari naho hasohowe benshi kuruta ahandi. Ni mu gihe Bubezi hasohowe 28, Mihigo 14, i Nyabihanga ho 10. Mu bindi bice naho basohora 10.
Burugumesitiri wa Komine Kayanza, Godefroid Niyonizigiye yavuze ko iki gikorwa gikomereza no mu bindi bice.
Ni igikorwa kirimo gukorwa muri Komine 9 zigize intara ya Kayanza. Abayobozi bayobora aya komini baravuga ko batagomba kwemera abagabo baharika abagore babo bakemeza ko ingo zose zashinzwe n’abagabo babana n’abagore kandi bafite izindi ingo zirimo abagore bakuru zigomba kusenywa hatitawe no ku madini yemerera abantu gushaka abagore benshi harimo Islam kuko u Burundi butubakiye ku idini.
Jimbere Magazine dukesha iyi nkuru yatangaje ko Umuyobozi w’Intara ya Kayanza, Rémy Cishayo yavuze ko iki gikorwa cyarangiranye no kuri iki cyumweru Tariki ya 31 Werurwe 2024. Bakaba bizeye y’uko nta rugo na rumwe mu ntara ayoboye rwubatswe mu buryo bw’ubuharike.
Imwe mu miryango yasenywe yavuze ko igiye gushora imanza kugirango abana babyariwe muri izo ngo bahabwe uburenganzira. Abaharanira uburenganzira bwa muntu baravuga ko nyuma y’iki gikorwa hagiye kwiyongera imanza nyinshi. Inzego z’ubutabera mu Burundi ntacyo ziratangaza kuri iyi ngingo.
@igicumbinews.co.rw
Kanda hasi ukurikire ibiganiro tukugezaho ku Igicumbi News Online TV:
