Rulindo: Itsinda rya Bijey Comedy ryatanze ibyishimo mu bukangurambaga bwo kurwanya ibiyobyabwenge
Kuri uyu wa Gatandatu tariki ya 16 Gicurasi 2026, mu Murenge wa Rukozo mu Karere ka Rulindo District, habereye igikorwa cy’ubukangurambaga bwo kurwanya ibiyobyabwenge mu rubyiruko cyateguwe n’itsinda ry’abanyarwenya rya Bijey Comedy ku bufatanye n’ubuyobozi bw’Umurenge wa Rukozo.
Iki gikorwa cyabereye ku kibuga cy’umupira cya Nyarububa, aho abaturage benshi bari bakubise buzuye baje gukurikirana ubutumwa bwatanzwe binyuze mu myidagaduro, umuziki n’amakinamico byari byateguwe n’abahanzi n’abanyarwenya batandukanye.
Mu bitabiriye iki gikorwa harimo abanyamakuru bavuka muri uwo murenge, abayobozi b’inzego z’ibanze ndetse n’abahanzi batandukanye barimo itsinda rya 2 Stars ryo mu Mujyi wa Kigali, Rulindo Talent Kids, umuhanzi Grace Nyiraminani ndetse n’umuhanzi Gizoo.
Ku isaha ya saa sita, umunyamakuru akaba n’umushusharugamba Moustafa Emmanuel, wavukiye mu Murenge wa Rukozo, ni we watangije gahunda yo gususurutsa abaturage bari bitabiriye icyo gikorwa. Yakurikiwe n’abahanzi batandukanye baririmbye ndetse banatanga ubutumwa bushishikariza urubyiruko kwirinda ibiyobyabwenge no kwita ku iterambere ryabo.
Itsinda rya Bijey Comedy ryari ryateguye imbyino n’amakinamico byafashije gutanga ubutumwa mu buryo bworoshye kandi bushimishije abaturage bari bitabiriye icyo gikorwa. Abitabiriye bagaragaje ko bishimiye uburyo ubutumwa bwatanzwe mu buryo bubafasha kubwumva neza.
Umunyamabanga Nshingwabikorwa w’Umurenge wa Rukozo, Bwana Shabani Jean Claude, yavuze ko abaturage bakwiye kwita ku buzima bwabo birinda kunywa inzoga nyinshi no gukoresha ibiyobyabwenge, ahubwo bagashyira imbaraga mu bikorwa bibateza imbere.
Yagize ati: “Abanyarukozo n’inshuti mwaturutse hirya no hino muri benshi, birashimishije cyane. Turashimira Bijey Comedy batekereje igikorwa nk’iki gifite ubutumwa bwiza ku rubyiruko. Turabasaba gutangira mituweri ku gihe, kwirinda umwanda aho mutuye, gukora amasuku no kwirinda inzoga nyinshi kuko nta terambere zatugezaho.”
Bamwe mu bari bitabiriye icyo gikorwa babwiye igicumbinews.co.rw ko banyuzwe n’impano z’abo bana bagize Bijey Comedy, bavuga ko bakwiye gushyigikirwa kugira ngo bakomeze gukoresha impano zabo mu gutanga ubutumwa bufasha abaturage.
Umwe muri bo yagize ati: “Turishimye cyane kuko aba bana bafite impano idasanzwe. Sinaherukaga kubona abantu bangana gutya buzura ikibuga kubera igikorwa nk’iki. Nibafashwa bashobora guhindura byinshi no gufasha inzego zitandukanye kugeza ubutumwa ku baturage.”
Ku ruhande rw’itsinda rya 2 Stars, ryamenyekanye cyane mu ndirimbo zirimo Kirigute, bavuga ko bafite ubushake bwo gukomeza gufasha Bijey Comedy kugira ngo irusheho gutera imbere no kugera kure.
Bagize bati: “Aba bana bafite ejo heza. Bakeneye gushyigikirwa no guhabwa amahirwe kuko benshi muri bo bakiri abanyeshuri ariko bafite impano ishobora kubageza kure.”
Bijey Comedy kandi yatangaje ko iri gukorana bya hafi na Rulindo Talent Kids ndetse na Umubano Bar & Restaurant ikorera i Gatete, aho batangiye kujya bakorera ibitaramo bitandukanye bigamije gususurutsa abaturage no gutanga ubutumwa bwubaka sosiyete.
Mu kiganiro cyihariye, umushoramari Ganiraneza Anathole yavuze ko yifuza gukomeza gushyigikira aba bana, harimo kubafasha kubona aho bakorera ibikorwa byabo ndetse no kubashakira andi mahirwe ashobora kubafasha gutera imbere nyuma yo kurangiza amasomo yabo.
Iki gikorwa cyasize benshi bishimiye uburyo ubuhanzi n’urwenya bishobora kwifashishwa mu gutanga ubutumwa bwubaka abaturage, cyane cyane urubyiruko, mu rwego rwo kurwanya ibiyobyabwenge no kwimakaza imibereho myiza.
Emmanuel Niyonizera Moustapha / Igicumbi News
