Misile za Iran zerekejwe mu bigo bya Gisirikare by’Amerika
Ikarita nshya yateguwe n’ikigo mpuzamahanga cy’itangazamakuru AFP igaragaza ko ibigo bikomeye bya gisirikare bya Leta Zunze Ubumwe za Amerika (USA) n’ibikorwaremezo bicumbikiye abasirikare bayo mu Burasirazuba bwo Hagati biri mu ntera ishobora kugerwamo(Target)n’ibisasu bya Iran byo mu bwoko bwa ballistic missiles zifite intera ndende.
Iyi karita igaragaza intera igerwamo n’ibisasu bikomeye bya Iran byo mu cyiciro cy’ibisasu bita intermediate-range ballistic missiles, bishobora kugera ku ntera iri hagati y’ibilometero byinshi bitewe n’uburemere bw’umutwaro (warhead) bitwaye. Abasesenguzi bavuga ko iyi ntera ishobora guhindagurika bitewe n’ikoranabuhanga ryifashishijwe n’ubwoko bw’igisirikare cy’isasu cyakoreshejwe.
Ibigo bya Amerika biri mu byibasiwe n’iyo ntera
Mu bigo bigaragara kuri iyi karita harimo ibiri mu bihugu nka Iraq, Syria, Kuwait, Qatar, Bahrain, United Arab Emirates, Saudi Arabia, ndetse no mu bice bimwe bya Jordan. Muri ibi bihugu, Amerika ifite ibigo by’ingenzi byifashishwa mu gucunga umutekano, ibikorwa by’indege za gisirikare, n’imirimo yo guhuza ingabo n’inshuti zayo mu karere.
Abahanga mu bya gisirikare bavuga ko ibi bigo bifite uruhare runini mu ngamba za Amerika zo gukumira iterabwoba, gucunga intambara zishobora kwaduka, no kurinda inyungu zayo n’iz’abafatanyabikorwa mu Burasirazuba bwo Hagati.
Impamvu iyi karita ifite agaciro
Iyi karita ya AFP igaragaza uko Iran ikomeje kwagura no kunoza ubushobozi bwayo mu by’igisirikare, cyane cyane mu rwego rw’ibisasu birasa kure. Nubwo Tehran ivuga ko izi ntwaro ari izo kwirwanaho, Amerika n’abafatanyabikorwa bayo babifata nk’ikintu gishobora guhungabanya umutekano w’akarere.
Ibyo byiyongera ku makimbirane asanzwe hagati ya Iran na USA, by’umwihariko ku bijyanye na porogaramu ya nucléaire ya Iran, ibihano by’ubukungu, n’uruhare Iran ishinjwa kugira mu mitwe yitwaje intwaro ikorera mu bihugu bitandukanye byo mu karere.
Icyo bivuze ku mutekano w’akarere
Abasesenguzi mu bya politiki n’umutekano bavuga ko kuba ibigo bya Amerika biri muri iyo ntera bishobora gutuma habaho kwiyongera kw’ingamba z’ubwirinzi, zirimo gushyira mu bikorwa sisiteme zo kurinda ibisasu (missile defense systems), kongera abasirikare, no gukaza imikoranire hagati ya Amerika n’ibihugu biyakira.
Banasaba ko hakomeza inzira z’ibiganiro bya dipolomasi kugira ngo hirindwe intambara yeruye ishobora kugira ingaruka zikomeye ku baturage bo mu karere no ku bukungu bw’isi muri rusange.
