Umuganga wo mu Bwongereza yateje impaka nyuma yo kuvuga ko inkingo za Covid-19 zaba zaragize uruhare mu burwayi bwa kanseri mu muryango w’ubwami
Ku wa Gatandatu tariki ya 6 Nzeri 2025, umuganga w’inzobere mu ndwara z’umutima wo mu Bwongereza, Dr. Aseem Malhotra, yatangaje ibintu byateje impaka n’amakenga menshi, aho yavugiye ku mugaragaro ko bishoboka ko inkingo za Covid-19 zaba zaragize uruhare mu burwayi bwa kanseri bwagize ingaruka ku banyamuryango b’umuryango w’ubwami bw’u Bwongereza.
Ibi yabivugiye mu nama ngarukamwaka y’ishyaka Reform U.K., riyoborwa na Nigel Farage, ryamamaye ku ngingo zijyanye no guhakana abimukira. Gusa iri shyaka ryahise ryitandukanya n’aya magambo ya Dr. Malhotra nyuma y’uko avuze Aya magambo bikaviramo uburakari mu nzego za leta, inzobere mu buzima n’amashyirahamwe afasha abarwaye kanseri.
Mu ijambo rye ryamaze iminota 20, Dr. Malhotra yavuze ko yabwiwe n’umwarimu mu by’ubuvuzi bwa kanseri ko “bishoboka cyane ko inkingo za Covid-19 zagize uruhare, kandi uruhare rufatika, mu burwayi bwa kanseri bugaragara mu muryango w’ubwami bw’u Bwongereza.”
Iyi mvugo yahise yamaganwa bikomeye n’ubuyobozi bw’u Bwongereza, aho bwavuze ko ari ibihuha bishobora guteza ingaruka mbi ku buzima bw’abaturage.
Minisitiri w’ubuzima, Wes Streeting, yagize ati:
“Mu gihe turi kubona ababyeyi benshi basubira inyuma mu gukingiza abana babo, ndetse indwara zimwe twari twaratsinze zikongera kugaruka, ni ibintu biteye ubwoba kubona Nigel Farage aha urubuga ibinyoma nk’ibi byuzuyemo uburozi. Farage akwiriye gusaba imbabazi kandi agahagarika burundu gukorana n’aba bantu bazana uburangare n’ubuhezanguni mu buzima rusange.”
Amashyirahamwe atandukanye afasha abarwaye kanseri ndetse n’inzobere mu buvuzi na yo yamaganye aya magambo, agaragaza ko nta gihamya na kimwe gihari cyerekana ko inkingo za Covid-19 zifitanye isano na kanseri.
Iyi mvugo ya Dr. Malhotra yongeye gusuka amavuta ku muriro w’ibihuha n’imyumvire y’urukingo yagiye igaragara mu gihe cya Covid-19, ibintu byakomeje kwibasira ibikorwa byo gukingira hirya no hino ku isi.
