Neymar n’abandi bakinnyi babiri ba PSG banduye Coronavirus
Neymar ni umwe mu bakinnyi batatu ba Paris Saint-Germain banduye Coronavirus, ariko ameze neza.
Mu itangazo yashyize hanze kuri uyu wa Gatatu, Paris Saint-Germain yavuze ko hari abakinnyi bayo batatu banduye Coronavirus, ariko ntiyatangaza amazina yabo.
Yakomeje igira iti “Abakinnyi bose n’abatoza bazakomeza gupimwa mu minsi iri imbere.”
Ikinyamakuru L’Equipe cyo mu Bufaransa, cyatangaje ko Neymar ari umwe mu bakinnyi banduye Coronavirus, ariko ameze neza.
Cyakomeje kivuga ko uko ari batatu banduye ubwo bavaga mu biruhuko i Ibiza muri Espagne, bityo bazishyira mu kato mu gihe cy’iminsi irindwi.
Abandi bakinnyi babiri banduye harimo Angel Di Maria na Leandro Parades bose bakomoka mu gihugu cya Argentine.
PSG yatwaye igikombe cya Shampiyona ya 2019/20 ndetse ikagera ku mukino wa nyuma wa Champions League, izatangira umwaka wa 2020/21 ikina na Racing Lens tariki ya 10 Nzeri.
Umukino wari gufungura Shampiyona y’Icyiciro cya Mbere mu Bufaransa (Ligue 1) ugahuza Marseille na Saint-Etienne wasubitswe mu kwezi gushize nyuma y’uko abakinnyi bane ba Marseille banduye.
Ligue 1 yabwiye amakipe ko ikipe izajya igira abakinnyi batatu cyangwa barenze uwo mubare, banduye Coronavirus, umukino wayo uzajya usubikwa.
@igicumbinews.co.rw
