18.05.2020: Amakuru mashya kuri Coronavirus mu Rwanda
Abantu batandatu bakize Coronavirus mu Rwanda mu gihe batanu bayisanganywe mu bipimo 1744 byafashwe kuri uyu wa Mbere.
Kuva umurwayi wa mbere agaragayeho Coronavirus mu Rwanda ku wa 14 Werurwe 2020, abantu 297 bamaze kuyisanganwa, muri bo abagera kuri 203 basezerewe mu bitaro nyuma yo gupimwa, ibizamini bikerekana ko nta bwandu bagifite mu mibiri yabo.
- Abanduye ni 297 (Batanu bashya)
- Abakize ni 203 (Batandatu bashya)
- Abakirwaye ni 94
- Nta murwayi uritaba Imana
- Ibipimo bimaze gufatwa ni 51 118 (ibipimo bishya 1744)
Kuri ubu mu bitaro byita ku banduye Coronavirus harimo abarwayi 94. Ni umubare muto ugereranyije n’abasezerewe [203] kuva aba mbere bavuye mu Kigo Nderabuzima cya Kanyinya ku wa 5 Mata 2020.
Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 4 856 183 bamaze kuyandura ku Isi yose, barimo 318 375 yahitanye na 1 888 116 bamaze kuyikira.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune cyangwa gukoresha alukoro yabugenewe, kwambara udupfukamunwa n’amazuru ahantu hose.
@igicumbinews.co.rw
