Turkey: Abaturage 250,000 basinze urumogi nyuma y’uko Polisi irutwitse
Mu gikorwa cyateguwe n’inzego z’umutekano mu rwego rwo kurwanya ikoreshwa n’icuruzwa ry’ibiyobyabwenge, harimo urumogi, mu mujyi wa Lice mu Ntara ya Diyarbakır, hatwitswe toni nyinshi z’urumogi. Nyamara iki gikorwa cyagize ingaruka zitari ziteganyijwe: abantu bagera ku 250,000 basinze urumogi kubera imyotsi yarwo yari yuzuye umujyi.
Amakuru yatangajwe n’ibitangazamakuru byo muri Turukiya avuga ko ubwo Polisi yatwikiraga urumogi rwatwawe mu bikorwa byo kururwanya, imyotsi yarwo yatangiye gukwira mu kirere, kubera umuyaga mwinshi wari uhari, maze yinjira mu mazu y’abaturage ndetse no mu duce dutandukanye tw’uyu mujyi.
Abaturage benshi batangiye kumva ibimenyetso by’uwasinze urumogi birimo guseka cyane, gutakaza icyerekezo, gusinzira cyangwa kugira imyitwarire idasanzwe. Ibitaro n’amavuriro byuzuye abantu baje kwivuza ibimenyetso bidasanzwe, bituma inzego z’ubuzima zishyiraho uburyo bwihuse bwo gutanga ubutabazi bw’ibanze.
Umwe mu baganga bo mu bitaro byo muri Diyarbakır yavuze ati: “Iyi ni inshuro ya mbere tubonye abantu ibihumbi basinze icyarimwe biturutse ku myotsi y’urumogi. Ni ikibazo gikomeye ku buzima, cyane cyane ku bana n’abagore batwite.”
Abayobozi b’umujyi batangaje ko bari gukora iperereza ku buryo ubwo bwoko bw’imyotsi bwashoboye gukwirakwira kuri urwo rugero, ndetse hatangiye n’ibiganiro ku buryo bwo guca burundu iyi ngeso yo gutwika ibiyobyabwenge hadatekerejwe ku ngaruka ku bidukikije no ku buzima bw’abantu.
Uturere twa Lice twamenyekanye cyane nk’ahantu hakorerwa ubuhinzi bw’urumogi ku buryo bunyuranyije n’amategeko, bityo inzego z’umutekano zikaba zarashyizemo imbaraga nyinshi mu kubirwanya. Icyakora, iyi nkuru irerekana ko uburyo bwo kururwanya nabwo bushobora guteza izindi ngaruka zikomeye.
Kugeza ubu, nta muntu wapfuye bivuye kuri iyi myotsi, ariko abarenga 1000 bashyizwe mu bitaro kugira ngo bakurikiranwe n’abaganga. Abaturage bo muri Lice barasaba ko hajyaho uburyo burambye bwo guhangana n’iki kibazo hadahungabanyijwe imibereho yabo.
@igicumbinews.co.rw
Kanda hasi ukurikire ibiganiro tukugezaho ku Igicumbi News Online TV:
About The Author
