Rubavu: Uruganda rwa WASAC rwahagaze gukora kubera imvura nyinshi
Abaturage batuye mu karere ka Rubavu by’umwihariko mu Mirenge ya Rubavu, Rugerero, Gisenyi na Nyamyumba barasabwa kwihangana no gukomeza kugira isuku mu gukoresha amazi, nyuma y’uko Sosiyete itanga amazi n’isukura mu Rwanda (WASAC) itangaje ko uruganda rutunganya amazi rwa Gihira ruhagaritswe by’agateganyo.
Ni icyemezo cyamenyeshejwe Abanyarwanda mu itangazo ryasohotse ku wa Mbere tariki 18 Kanama 2025, aho WASAC yasobanuye ko nyuma y’imvura nyinshi yatangiye kugwa mu mpera z’icyumweru ishize, igateza ibikorwa by’imyuzure n’ibyondo mu migezi ya Pfunda na Sebeya, isanzwe yifashishwa mu guha amazi uruganda rwa Gihira.
Mu itangazo, WASAC yagize iti: “Turamenyesha abakiriya bacu bo mu Karere ka Rubavu batuye mu Mirenge ya Rubavu, Rugerero, Gisenyi na Nyamyumba ko uruganda rutunganya amazi rwa Gihira rutari gukora kubera amazi y’imvura yanduje imigezi yinjirira mu ruganda. Turakora ibishoboka byose kugira ngo rutangire vuba.”
Yakomeje ivuga ko inzobere zayo ziri gukora ibishoboka byose kugira ngo zisukure inzira z’amazi no kongera gutangiza urwo ruganda vuba bushoboka.
WASAC isaba abaturage kugabanya ikoreshwa ry’amazi, kuyateka mbere yo kuyanywa cyangwa kuyakoresha mu gutegura amafunguro, no kubika neza amazi make bafite, mu rwego rwo kwirinda indwara zifata inzira y’igogora zishobora guterwa no gukoresha amazi yanduye nka impiswi n’indwara z’igifu.
Ubuyobozi bw’Akarere ka Rubavu nabwo bwahumurije abaturage buvuga ko buri gukorana na WASAC kugira ngo ikibazo gikemuke mu gihe gito gishoboka.
Ibi bibazo bibaye mu gihe imvura imaze iminsi igwa mu Ntara y’Iburengerazuba yangije ibikorwa remezo bitandukanye birimo imihanda, ibikorwa by’amazi ndetse n’amashanyarazi.
Abaturage basabwa gukomeza gukurikiza amabwiriza y’inzego z’ubuzima no gutanga amakuru ku gihe mu gihe babonye ibindi bibazo byarushaho guterwa n’ihagarara ry’urwo ruganda.
