RDC: Leta yahagaritse burundu ibikorwa bya PPRD, ishyaka rya Joseph Kabila
Urukiko rwa Kinshasa/Gombe rwatangaje ku mugaragaro ko ibikorwa by’ishyaka rya Parti du Peuple pour la Reconstruction et la Démocratie (PPRD), rishingiye kuri Joseph Kabila, byahagaritswe by’agateganyo hashingiwe ku itegeko ryasohotse ku wa 18 Ukwakira 2025.
Itangazo ryasinywe na Panzu Salah, umwanditsi (greffier) mu Rukiko Rukuru rwa Kinshasa/Gombe, ryasohowe ku wa 27 Ukwakira 2025 ku busabe bwa Umunyamabanga Mukuru ushinzwe imibanire n’amashyaka ya politiki muri Leta ya Repubulika Iharanira Demokarasi ya Kongo (RDC).
Nk’uko inyandiko ibivuga, iryo tangazo rishingiye ku cyemezo cya Minisitiri w’Intebe Wungirije ushinzwe umutekano n’ibikorwa remezo by’ubutegetsi bw’ibanze (Décentralisation), ari we Minisitiri w’imbere mu gihugu, cyafatiwe muri minisiteri ku itariki ya 18 Ukwakira 2025, gifite nomero N°25/CAB/VPM/MININTERSEC/DECAC/SLB/060/2025.
Iryo tegeko rivuga ko ibikorwa byose bya PPRD bihagaritswe, ishyaka ryashinzwe na Joseph Kabila Kabange, wahoze ari Perezida wa RDC kuva mu 2001 kugeza mu 2019.
Mu nyandiko ya minisiteri, igaragaza ko iyo gahunda yo guhagarika PPRD igamije gukumira ibikorwa “bishobora guhungabanya umutekano n’ituze ry’igihugu.”
Greffier Panzu Salah yemeje ko icyemezo cyasinywe ku ishyaka cya PPRD cyashyizwe ku rubaho rwa Tribunal kugira ngo abaturage bose babimenye, kuko abayobozi baryo batari bafite aho babarizwa cyangwa amazu yanditseho izina ryabo mu gihugu cyangwa hanze ya RDC.
Yagize ati: “Kubera ko ishyirwa mu bikorwa ry’iri tangazo rigomba gukorwa mu buryo bw’amategeko, kandi abarebwa naryo badafite aho babarizwa mu gihugu, nakoresheje uburyo bwo kurimanika ku muryango w’Urukiko kandi nanditse kopi yaryo mu Journal Officiel kugira ngo ritazafatwa nk’itaramenyekanye.”
Kabila mu bibazo bikomeye: Urukiko rumukatiye urupfu
Aya makuru aje mu gihe Joseph Kabila ubwe akomeje gukorwaho iperereza rikomeye n’inzego za gisirikare za RDC. Ku wa 20 Ukwakira 2025, urukiko rwa gisirikare rwa Kinshasa rwamukatiye igihano cy’urupfu, rumushinja “ubufatanyacyaha mu bikorwa byo guhungabanya umutekano w’igihugu” no “guteza imvururu zishingiye ku mitwe yitwaje intwaro.”
Amakuru y’Urukiko avuga ko Kabila yahamwe n’ibyaha byo gutera inkunga umutwe wa AFC/M23, ugenzura igice kinini cy’intara ya Kivu y’Amajyaruguru.
Nubwo ari mu buhungiro, Kabila aherutse no kwitabira inama yabereye i Nairobi, aho yahuriye n’abahoze ari abayobozi b’inzego z’umutekano ndetse n’abanyapolitiki b’abanyekongo. Iyo nama y’i Nairobi bivugwa ko igamije kurebera hamwe uburyo bushya bwo “gucungura ubutegetsi bwa Kinshasa” binyuze mu nzira zifatika za politiki cyangwa iz’igisirikare.
Ishyaka PPRD mu nzira ishibuka
PPRD ni rimwe mu mashyaka akomeye yashinze imizi muri RDC kuva mu 2002, rikaba ari ryo ryahaye Joseph Kabila imbaraga zatumye aguma ku butegetsi imyaka irenga 18. Ariko kuva yahagarika kuyobora igihugu mu 2019, ishyaka ryagiye ritakaza abayoboke benshi ndetse ryahozwaga mu manza zishingiye ku bikorwa byo guhungabanya umutekano.
Iri tangazo ry’Urukiko Rukuru rya Kinshasa/Gombe rishyira akadomo ku rugendo rwa politiki rwa PPRD, ishyaka ryabaye ikimenyetso gikomeye cy’igihe cya Kabila mu mateka ya politiki ya RDC.
