Perezida wa Iran yitabiriye imyigaragambyo yo kwamagana ibitero bya Amerika

Tehran, Iran – ku cyumweru, tariki ya 22 Kamena 2025 — Perezida wa Repubulika ya Kisilamu ya Iran, Dr. Massoud Pezeshkian, yagaragaye mu ruhame, aho yifatanyije n’abaturage mu myigaragambyo yabereye ku kibuga Enghelab, i Tehran, bashinja Leta Zunze Ubumwe za Amerika n’Israël kugira uruhare mu bitero byibasiye ibikorwa bya kirimbuzi bya Iran.

Mu gihe imyigaragambyo yari irimo umuvundo n’umujinya mwinshi, abaturage bazamuraga amaboko bavuga bati “Kwihorera, Kwihorera!”, bashinja Amerika kuyoboka inzira y’intambara. Perezida Pezeshkian yari agaragiwe n’abashinzwe umutekano ubwo yageragezaga kugendagenda mu bantu kugira ngo agere aho yatangiye imbwirwaruhame.

Mu masaha make mbere y’iyi myigaragambyo, Perezida Pezeshkian yari yamaganye ku mugaragaro igitero cyagabwe ku bikorwa bya kirimbuzi biri mu ntara za Natanz na Fordow, avuga ko ari igikorwa cy’ubushotoranyi “gikoze mu ibanga ariko cyateguwe na Washington”, ashinja Amerika “ubufatanyacyaha butaziguye mu mugambi wa Israël wo kuburizamo ubushobozi bwa Iran bwo kwirwanaho”.

Ibihugu bikomeye ku isi byatangiye kugira icyo bivuga ku ntambara ya Israel na Iran

Imibare igaragaza ko kuva tariki 19 Kamena, ibitero byakozwe kuri Iran bikomeje gutera impungenge mpuzamahanga, cyane cyane mu bihugu bifite uruhare runini mu mutekano w’akarere ka Moyen-Orient.

Leta Zunze Ubumwe za Amerika:

Ibiro bya Perezida Trump byatangaje ko Amerika itagize uruhare rutaziguye mu gitero cyagabwe ku butaka bwa Iran, ariko yongeyeho ko “Iran ubwayo ikomeje kuba icyago ku mutekano w’akarere kubera gahunda yayo yo kwigwizaho intwaro za kirimbuzi”. Umuvugizi wa White House yavuze ko Amerika izakomeza gushyigikira uburenganzira bwa Israël bwo kwirwanaho, mu gihe igitero cyose cyagabwe kuri Israël “gifatwa nk’igitero ku nyungu zacu muri ako karere”.

Uburusiya:

Perezida Vladimir Putin yagaragaje impungenge z’uko iyi ntambara ishobora kuzarushaho gutiza umurindi akaduruvayo mu karere. Mu itangazo rya Kremlin, Uburusiya bwamaganye igitero cyose cyambukiranya imbibi, buvuga ko “hakenewe inzira ya dipolomasi aho kuba intwaro”.

Ubushinwa:

Ubushinwa bwasabye ibihugu byombi guhagarika ibikorwa by’imitwe yitwaje intwaro n’ibisasu, buvuga ko “amahoro n’umutekano ari byo bikenewe mu karere karimo ibibazo byinshi by’ubukungu n’umutekano muke”.

Ubumwe bw’u Burayi:

Komisiyo y’Ubumwe bw’u Burayi yasohoye itangazo rihamagarira ihagarikwa ry’ibikorwa byose by’intambara, ariko inasaba Iran gusobanura neza gahunda yayo ya kirimbuzi, inasaba Israël kwirinda ibikorwa bishobora gutuma ibintu byarushaho kuba bibi.

Umwuka urakomeje kuba mubi i Tehran

Kuva igitero cyagabwe ku bikorwa bya kirimbuzi byatangira gutangazwa na televiziyo y’igihugu (IRIB), abaturage i Tehran no mu yindi mijyi irimo Mashhad, Esfahan na Qom, batangiye kwiyongera mu myigaragambyo bashinja Amerika kuba inyuma y’ibikorwa byose bigamije “gusuzugura ubusugire bwa Iran”.

Ibikorwa by’ubucuruzi byarafunzwe ku ngufu mu bice bimwe bya Tehran, imbuga za internet n’imiyoboro ya telefone bikomeza kuvaho umwanya ku wundi, ibintu abasesenguzi bafata nk’uburyo guverinoma iri kugerageza gukumira umuvuduko w’ikwira ry’amakuru y’intambara.

Ibi bishobora kuvamo iki?

Abasesenguzi mpuzamahanga barimo Dr. Ali Vaez wo mu kigo International Crisis Group, bemeza ko “iyi ntambara nshya hagati ya Iran na Israël ishobora gutuma akarere ka Moyen-Orient kinjira mu kindi cyiciro cy’intambara z’urudaca zitagira iherezo”. Hari impungenge ko aya makimbirane ashobora gukurura ibihugu by’inshuti bya buri ruhande, bigatuma ibintu birushaho gukomera.

Igicumbi News | Tehran – 22 Kamena 2025