Nyamasheke: Umukecuru w’imyaka 80 yasanzwe mu cyobo cy’ubwiherero ari muzima nyuma y’iminsi ibiri yaraburiwe iremgero

Nyamasheke, Ruharambuga – Ku wa 13 Nyakanga 2025

Mu kagari ka Wimana, umurenge wa Ruharambuga, Akarere ka Nyamasheke, haravugwa inkuru idasanzwe y’umukecuru w’imyaka 80 wasanze mu cyobo cy’ubwiherero amaze iminsi ibiri aburiwe irengero, ariko akaba yarakuwemo ari muzima.

Ni inkuru yasakaye cyane mu gace ka Gakomeye, aho uyu mukecuru, wari usanzwe abana n’umuhungu we n’umukazana we mu nzu bamwubakiye hafi y’urugo, yaburiwe irengero ku mugoroba wo ku wa Gatatu, tariki 9 Nyakanga. Mbere yo kubura, ngo yari yabwiye umukazana we ko agiye kuvumba inzoga, gusa ntiyagaruka.

Mu masaha y’ijoro ubwo yari atarataha, umuryango we watangiye kugira impungenge maze batangira ibikorwa byo kumushakisha bafatanyije n’abaturanyi ndetse n’inzego z’ibanze. Aho bamushakiye hose harimo amashyamba, ibyobo, imiferege, inzu zishaje zidatuyemo ndetse no ku nkengero z’Ikiyaga cya Kivu, ariko baramubura.

Hashize iminsi ibiri, tariki ya 11 Nyakanga, abashakishaga bahisemo kwicamo amatsinda. Umwuzukuru w’uwo mukecuru ari mu itsinda ryajyaga gusaka ahahoze hakorerwa ibikorwa by’ivugabutumwa, hafi n’ubwiherero butari bugikoreshwa, aho yaje kubona intoki z’umuntu zinyeganyeza mu cyobo. Yahise atabaza, hihutirwa gufasha uwo muntu — maze umukecuru avamo ari muzima.

Abo bari kumwe bavuga ko yari afite intege nke, amaguru abyimbye, kandi afite igihunga, ariko nta bikomere bikomeye byagaragaye ku mubiri we.

Ntagayisha Claude, Umunyamabanga Nshingwabikorwa w’agateganyo w’Umurenge wa Ruharambuga, yatangaje ko iyi nkuru ikwiye gufatwa nk’isomo n’amahirwe adasanzwe.

Yagize ati:

“Ni amahirwe adasanzwe kubona umukecuru nk’uriya w’imyaka 80 amara iminsi ibiri mu cyobo cy’ubwiherero kitari gikoreshwa, ariko agakurwa mo akiri muzima. Twashakishije ahantu hose nta wari uzi aho ari. Ubu aritabwaho n’abaganga ndetse n’abashinzwe kumuganiriza kugira ngo n’ubwo yaba yarahuye n’ihungabana, ahumurizwe.”

Uyu mukecuru we ubwe yatangaje ko ubwo yageraga hafi y’icyo cyobo, yari agiye kuhahira ubwatsi. Yahise agwamo, agerageza gukoresha inkoni yari afite acukura akinjiza ikirenge mu mwobo agamije kwivanamo, ariko byaramunaniye. Ngo yumvaga amajwi y’abantu, ariko nta n’umwe wigeze amwumva cyangwa akeka ko ari mu bwiherero.

Ubuyobozi bwafashe ingamba nshya zigamije kwirinda ko ibindi byago nk’ibi byongera kubaho. Bwategetse ko ahantu hose hashobora guteza impanuka hafungwa, cyane cyane muri ibi bihe by’ibiruhuko aho abana bakinira ahantu hatandukanye.

Iyi nkuru yagaragaje akamaro ko gufatanya kw’abaturage n’ubuyobozi mu gukumira no gukemura ibibazo, ikanibutsa ko ubuzima bw’abantu bukwiye kwitabwaho mu buryo bwihariye, cyane cyane mu gihe cy’ihungabana no mu mibereho ya buri munsi.

Inkuru ya Igicumbi News | Nyamasheke – Rwanda