Manase Mutatu wahoze akina muri Rayon Sports yerekeje muri Etincelles FC
Etincelles FC yo mu Karere ka Rubavu yongeye kwiyubaka ikomeza gushaka kongera kuba imwe mu makipe akomeye mu Rwanda, nyuma yo gusinyisha rutahizamu ukomoka muri Repubulika Iharanira Demokarasi ya Congo, Manase Mutatu, wahoze akinira Rayon Sports ndetse na Gasogi United.
Uyu mukinnyi wari umaze igihe atagaragara cyane mu makipe yo mu Rwanda, kuri ubu yasinye amasezerano y’imyaka ibiri azamuhesha gukina muri Etincelles FC kugeza mu mwaka wa 2027.
Umukinnyi ufite amateka mu Rwanda
Manase Mutatu yageze mu Rwanda bwa mbere akinira Rayon Sports, ikipe yamuhaye izina no kwigaragaza mu mupira w’u Rwanda. Nyuma yo kuva muri Gikundiro, yakomereje muri Gasogi United, ikipe imenyerewe mu gushaka abakinnyi bakiri bato no kubaha amahirwe yo kwigaragaza.
Abakunzi b’umupira bamuzi nk’umukinnyi ufite imbaraga no gukina nk’uwifuza guhatana, nubwo atigeze aramba cyane mu makipe yabayemo.
Etincelles FC ikomeje kwiyubaka
Etincelles FC, ikunze kwitwa Gari ya Moshi, ni imwe mu makipe afite amateka maremare mu mupira w’u Rwanda ariko ikaba yarananyuze mu bihe bitoroshye byiganjemo imikorere idahwitse ndetse no kutitwara neza mu mikino. Ubuyobozi bw’iyi kipe bwatangaje ko kwinjiza Manase Mutatu ari kimwe mu bikorwa byo kuzamura urwego rw’ikipe no kugarura icyizere cy’abakunzi bayo.
Umwe mu bayobozi muri Etincelles FC yabwiye Igicumbi News ko bahisemo uyu mukinnyi kubera ubunararibonye afite mu irushanwa rya shampiyona y’u Rwanda. Yagize ati: “Turashaka kongera guhesha ishema abafana bacu. Gusinyisha Manase Mutatu ni intangiriro yo kugaragaza ko Etincelles FC igiye kuba ikipe ikomeye mu myaka iri imbere.”
Gusinyisha abakinnyi bafite amateka mu makipe akomeye nka Rayon Sports ni ikimenyetso cy’uko amakipe y’Uturere atangiye guhatana ku isoko ry’abakinnyi. Byitezwe ko Manase Mutatu azahura n’igitutu cyo kwerekana impinduka no gufasha Etincelles FC kubona umusaruro mwiza.
Abakunzi b’umupira bategereje byinshi
Abakunzi b’umupira mu Karere ka Rubavu n’ahandi hose bazitabira kureba imikino ya Etincelles FC, biteze kubona niba koko uyu munye-Congo azongera kwigaragaza nk’uko yabigenje akiri muri Rayon Sports.
