Kamonyi: Ibaruwa Mayor Dr Nahayo Yandikiye SEDO w'Akagari yarikoroje

Mu karere ka Kamonyi, haravugwa inkuru imaze iminsi ivugisha benshi ku mbuga nkoranyambaga no mu baturage, nyuma y’uko Madamu Bamurigire Hilarie, ushinzwe Iterambere n’Imibereho myiza mu Kagari ka Nyagishubi, yandikiwe ibaruwa imusaba gusobanura ku magambo bivugwa ko yanditse ku rubuga rwa Whatsapp rwitwa Kamonyi SEDO.

Iyo baruwa yanditswe ku wa 19 Kanama 2025, ishyizweho umukono na Dr. Nahayo Sylvere, Umuyobozi w’Akarere ka Kamonyi, igasaba Madamu Bamurigire kugaragaza ibisobanuro ku byo ashinjwa byo gutanga ubutumwa bugaragara nk’ubusebya mugenzi we ukorera Leta.

Ibaruwa yateje impaka

Nk’uko bigaragara mu nyandiko yasohowe, uyu mukozi ashinjwa kuba yaranditse ubutumwa bwerekana ko hari mugenzi we, nawe ukorera mu nzego za Leta, witwaye nabi. Ubuyobozi bw’Akarere bukavuga ko ubwo butumwa bushobora gufatwa nk’isesereza rishobora guteza amakimbirane mu kazi.

Mayor w’Akarere, Dr. Nahayo Sylvere, yasabye ko Bamurigire Hilarie atanga ibisobanuro mu gihe kitarenze iminsi itanu (5) akimara kubona ibaruwa, kandi akabyandika ku buryo bwemewe.

Abaturage n’abakoresha imbuga nkoranyambaga babivuzeho

Iyi baruwa imaze gusakara, yatumye abantu batari bake bagira icyo bayivugaho. Bamwe mu baturage ndetse n’abakoresha imbuga nkoranyambaga bagaragaje ko amagambo y’umunyamabanga nshingwabikorwa yifashishijwe nk’umusingi w’iyi baruwa atari akwiriye, kuko bishobora kugaragara nk’uburyo bwo gucecekesha abakozi cyangwa kubima ubwisanzure bwo gutanga ibitekerezo.

Hari abagaragaje ko amagambo ya Gitifu ari ay’ubwikanyize ndetse atari akwiye ku muyobozi ushinzwe gukorera abaturage.

Mayor nawe yanenzwe

Nubwo ibaruwa yanditswe ku buryo bweruye kandi bwemewe, hari ababonye ko uburyo Mayor w’Akarere yayishyizeho umukono ari nko gushyigikira ibivugwa na Gitifu, ibintu byabaye ikindi kibazo kivugishije abantu. Bamwe bavuze ko byari kuba byiza iyo mbere yo kwandika ibaruwa nk’iyi, habanza kubaho ibiganiro n’uburyo bwo gukemura ikibazo mu mahoro, aho guhita byandikwa mu nyandiko bigatuma bisakara ku mugaragaro.

Hari n’abemeza ko ibi bishobora gusiga isura mbi ku Karere ka Kamonyi, mu gihe byerekana ko hari umwuka mubi mu bakozi b’akarere nyamara abaturage baba bifuza kubona abayobozi bafatanya, aho gusebanya.

Icyo abaturage basaba

Hari Abaturage bo mu karere ka Kamonyi babwiye Igicumbi News ko abayobozi b’inzego z’ibanze bajya bibuka ko ijambo ryabo rifite uburemere, bakaririnda kugira rikorwa mu buryo bushobora gusenya icyizere cy’abaturage n’ubufatanye mu kazi.

Abandi bakongeraho ko ibibazo bikwiye gukemurwa mu nzira y’ubwumvikane aho kuba ibaruwa zishyirwa ku karubanda, bikaba byatera urwikekwe n’amakimbirane y’imikorere.

Post Views: 336