Burundi: Abapolisi n’Imbonerakure barimo guhohotera impunzi z’Abanyekongo babashinja kuba intasi za M23

Igicumbi News | 9 Nyakanga 2025

Kuva ku wa Mbere tariki ya 8 Nyakanga 2025, impunzi z’Abanyekongo ziri mu majana zafashwe mu bikorwa byagutse by’ubuyobozi bw’umutekano w’u Burundi, byiganjemo igipolisi n’urubyiruko rw’Imbonerakure rwa CNDD-FDD. Abo banyekongo bari batuye mu misozi yo mu turere twa Cibitoke na Bukinanyana, hafi y’umupaka wa Repubulika Iharanira Demokarasi ya Congo (RDC). Bamwe birukanywe ku ngufu, abandi berekezwa ku rubibe rwa Gatumba, bakaba babayeho mu buzima bubi burangwa n’inzara n’icuraburindi.

Impunzi zisaga 500 zafashwe mu gihe cy’iminsi ibiri

Ku munsi wa mbere w’igikorwa, ku ya 8 Nyakanga, polisi n’Imbonerakure bafashe impunzi 80 mu Gasenyi-Buganda, abandi 72 bafatwa mu Rukana. Ku munsi wakurikiyeho, ku wa kabiri, ibikorwa byarakomeje, maze abantu 426 bafatirwa mu nzira zitandukanye, barimo umunani bafatiwe mu ruganda rwitwa “Swahili” mu Rugombo-Centre. Bose hamwe, abashyika 578 ni bo bari bamaze gukusanywa.

Abashinzwe umutekano babasabye guhitamo inzira ebyiri: kujya mu nkambi zemewe cyangwa gusubizwa muri Congo.

Umwe mu mpunzi wafashwe yagize ati:
“Badusohoye ku ngufu kandi nta kosa twari twakoze. Twabanye neza n’Abarundi. Twanze kujya mu nkambi kuko ubuzima burimo ari bubi. Twirukanywe, ubwo nta kundi, tuzasubira muri Congo.”

Igisobanuro cy’ubuyobozi bw’umutekano

Umwe mu bayobozi b’igipolisi utifuje ko amazina ye atangazwa yavuze ko icyemezo cyo gukusanya izo mpunzi cyafashwe kubera “impungenge z’umutekano.” Yagize ati:
“Hari impunzi z’Abanyekongo zigaragara ko zifashwa n’imiryango mpuzamahanga kurusha abaturage b’Abarundi. Twanabonye ko bamwe bafitanye isano n’umutwe wa M23. Ni cyo cyatumye hafatwa icyemezo cyo kubasubiza iwabo.”

Ku rubibe rwa Gatumba inzira zafunzwe 

Nubwo impunzi zoherejwe ku rubibe rwa Gatumba kugira ngo zambuke zerekeze i Uvira, inzira zarafunzwe n’umutwe wa Wazalendo, ufashwa na Kinshasa, wanze ko abo baturage bataha. Ibi byatumye impunzi nyinshi ziguma ku mupaka, zifite inzara, abana barara hanze baribwa n’imibu, abandi bagasindagira ku zuba ryo mu gitondo.

Umwe mu bahagarariye impunzi yagize ati:
“Abo ni abantu bahunze Kamanyola, si abanzi. Dusaba Wazalendo kubareka bagahungira aho bumva batekanye.”

Ku ruhande rwa HCR, nta mwunganizi wayo wabashije kuboneka kugira ngo agire icyo atangaza.

Uvira n’akarere mu rujijo

Mu mujyi wa Uvira, umutekano ukomeje kuba muke nyuma y’uko imirwano y’imiryango yitwaje intwaro yatangiye kwigaragambya, yigaragambiriza ishyirwaho rya Général Olivier Gasita, ukomoka mu Banyamulenge, wagizwe umuyobozi wungirije w’akarere ka 33 k’igisirikare. Iyo miryango imushinja gukorera u Rwanda. Amakuru agera ku Igicumbi News aravuga ko yamaze kuva Uvira kuri ubu arabarizwa mu mu mujyi wa Bujumbura.

Muri ako karere, ibikorwa byinshi by’ubucuruzi n’amashyirahamwe byahagaze, mu gihe imyigaragambyo irimo Wazalendo n’indi miryango yigenga yari imaze iminsi iba.

Umubano wa M23, u Rwanda n’Uburundi

M23, ubu ugenzura igice kinini cya Nord-Kivu na Sud-Kivu harimo n’umujyi wa Kamanyola aho impunzi zaturutse, ishinjwa gufashwa na Kigali, ibintu u Rwanda rwakunze guhakana.

Uburundi nabwo bwoherereje abasirikare barenga 10,000 mu Burasirazuba bwa Congo mu gufasha FARDC hamwe n’indi miryango ifatanya na Leta mu kurwanya M23.

Amakuru ava Uvira avuga ko abantu cumi na babiri bishwe mu mirwano yahuje FARDC n’indi mitwe yitwaje intwaro ya Wazalendo ku wa mbere mu mujyi wa Uvira.