Alliance Fleuve Congo (AFC/M23) yashinje Kinshasa kongera kurenga ku masezerano y’ihagarikwa ry’intambara
Goma, ku wa Gatatu tariki ya 27 Kanama 2025 – Umutwe wa Alliance Fleuve Congo (AFC/M23) watangaje ko ubabajwe no kuba ubutegetsi bwa Kinshasa bukomeje kurenga ku masezerano y’ihagarikwa ry’intambara, bugamije guca intege inzira y’amahoro yatangiriye i Doha.
Mu itangazo ryashyizweho umukono n’umuyobozi ushinzwe itangazamakuru muri AFC, Lawrence Kanyuka, wavuze ko kuva ku wa 26 kugeza ku wa 27 Kanama 2025, ingabo za Leta ya Kongo (FARDC) zifatanyije n’inyeshyamba za FDLR, imitwe y’abacanshuro, abarwanyi b’Abarundi n’abiyita Wazalendo, bagabye ibitero ku bice bikikije agace ka Kadasomwa, gatuyemo abantu benshi.
Ibitero ku Banyamulenge i Minembwe
AFC/M23 yatangaje ko ku wa 27 Kanama 2025 habayeho indi ntambara ikaze yibasiye abaturage b’inkomoko ya Banyamulenge batuye mu misozi miremire ya Fizi, ahazwi nka Hauts-Plateaux de Fizi. Mu bice bya Rugezi na Minembwe ngo ni ho habereye imirwano ikomeye yaguyemo abantu benshi, abandi bakurwa mu byabo ku bwinshi.
Itangazo rivuga ko ibyo bitero byagize ingaruka “ziremereye kandi zidashobora gusobanurwa”, bigateza umubare munini w’impunzi ndetse bigahindura isura y’ibibazo by’ubutabazi mu Karere.
AFC/M23 ivuga ko ibi bikorwa by’igisirikare cya Kinshasa n’abo bafatanyije na cyo bigamije ishyirwa mu bikorwa rya gahunda ndende yo kurimbura abaturage b’inkomoko ya Banyamulenge, kandi ngo bikorwa ku mugaragaro bifatanyije n’ingabo z’u Burundi.
Guhangayikishwa n’akarengane n’ituza ry’abaturage
Muri iri tangazo, AFC/M23 yashimangiye ko ibi bikorwa “bikorwa ku buryo bateguwe kandi bishyirwa mu bikorwa n’abafite ubudahangarwa bwuzuye, bakorera mu bwiru bw’amahanga n’imiryango yagakwiye kuba irengera uburenganzira bwa muntu”.
Umuvugizi wa AFC/M23 yemeje ko bitewe n’ubukana bw’aya mahano, ingabo zabo zagombaga kwinjira mu rugamba kugira ngo barengere abaturage b’abasivili bari mu kaga.
Gusaba amahanga kudaceceka
AFC/M23 yanenze bikomeye umuryango mpuzamahanga ndetse n’imiryango itegamiye kuri Leta ku “kuguma mu mutuzo nk’aho nta kintu kibaye”, kandi ibi bikorwa bikaba bihitana ubuzima bwa benshi.
Yongeyeho ko AFC/M23 izakomeza “guhagarara ku ruhande rw’abaturage, kubarinda no kubarwanira kugeza igihe ibitero byose bihagaritswe”.
