Aliko Dangote yageze ku mutungo wa miliyari 30 z’amadolari, aba umuntu wa mbere ukize cyane muri Afurika
Umushoramari ukomoka muri Nigeria, Aliko Dangote, ukomeje kumenyekana nk’umuntu wa mbere ukize kurusha abandi muri Afurika, yamaze kugera ku mutungo wa miliyari 30 z’amadolari ya Amerika nk’uko byatangajwe ku wa 23 Ukwakira 2025.
Uyu mutungo ukomeye uje nyuma y’uko umunyemari Dangote yungutse miliyari 2.16 z’amadolari kuva uyu mwaka watangira, ndetse akongeraho undi mutungo wa miliyoni 430 z’amadolari mu mezi aheruka, bitewe n’izamuka ry’agaciro k’imigabane n’ibikorwa bye by’ubucuruzi.
Mu rwego rwo kwagura ibikorwa bye, Dangote yasoje uruganda rushya rwa sima rwuzuye muri Côte d’Ivoire rwatwaye asaga miliyoni 160 z’amadolari, rukaba rugamije kongera ubushobozi bwo gutunganya sima no guhaza isoko ry’Afurika riri kwiyongera ku muvuduko ukomeye.
Uretse uruganda rwa sima, Dangote afite n’umushinga ukomeye wo kwagura uruganda rwe rutunganya peteroli, aho ateganya kongera ubushobozi bwo gutunganya peteroli bukagera kuri barili miliyoni 1.4 ku munsi, bikamugira umwe mu bashoramari bafite uruganda rufite ubushobozi bwo gutunganya peteroli nyinshi kurusha ahandi hose ku isi.
Abasesengura ubukungu bavuga ko iyi ntambwe nshya ya Dangote ari ikimenyetso cy’uko ishoramari ryubakiye ku byifuzo by’abaturage n’ibikenerwa bya buri munsi nk’ibikoresho by’ubwubatsi n’ingufu, rifite ejo heza muri Afurika.
Aliko Dangote, wavutse mu 1957, amaze imyaka irenga 40 mu bikorwa by’ubucuruzi byagutse ku mugabane wose wa Afurika, birimo sima, isukari, umunyu, ifu n’amavuta yo guteka. Ubu, ibikorwa bye byaguye no mu nganda zikomeye z’amavuta ya peteroli, bikamugira umwe mu bantu bake ku isi bafite imishinga ifite ingaruka zifatika ku bukungu bwa Afurika.
Abasesenguzi bavuga ko uyu mutungo mushya ushobora kongera icyizere mu bashoramari b’abanyafurika, ndetse n’ibihugu byinshi bikaba bishobora kwiga ku rugero rwa Dangote mu guteza imbere ubukungu bushingiye ku bikorwa bifatika aho kuba ku nguzanyo n’amasezerano mpuzamahanga gusa.
