Afurika y’Epfo itsinze Amavubi ihita ikatisha itike yo kujya mu Gikombe cy’Isi

Mu mukino wari utegerejwe na benshi mu rugendo rwo gushaka itike y’igikombe cy’Isi cya 2026 (World Cup Qualifiers 2026), ikipe y’igihugu y’Afurika y’Epfo, Bafana Bafana, yatsinze u Rwanda ibitego 3-0 mu mukino wabereye i Johannesburg kuri uyu wa Kabiri.

Umunyezamu w’u Rwanda ntiyabashije guhagarika ubukana bw’iyi kipe y’Afurika y’Epfo yatangiye umukino isatira cyane, ikaba yahise ifungura amazamu hakiri kare ku gitego cyatsinzwe na T. Mbatha ku munota wa 5, nyuma yo gukoresha neza ikosa ry’umunyezamu w’Amavubi.

Ntibyatinze kuko ku munota wa 26, O. Appollis yatsinze igitego cya kabiri nyuma yo gucenga ba myugariro b’u Rwanda maze atsinda mu izamu ryari risigaye ubusa. U Rwanda rwagerageje gusubiza ariko amahirwe yabonetse ntiyabyazwa umusaruro.

Igice cya kabiri cyatangiye Amavubi yihagazeho ariko ntibyabujije E. Makgopa gushyiramo igitego cya gatatu ku munota wa 72, cyafashe nk’ikimenyetso cy’uko Bafana Bafana bari begukanye intsinzi idashidikanywaho.

Iyi ntsinzi yahise ituma Afurika y’Epfo ibona itike y’ijonjora rya nyuma ry’Igikombe cy’Isi cya 2026, izabera muri Leta Zunze Ubumwe za Amerika, Canada na Mexico. Ni ishimwe rikomeye kuri Bafana Bafana, kuko baherukaga gukina Igikombe cy’Isi mu 2010 ubwo cyaberaga iwabo.

Ku ruhande rw’u Rwanda, iyi ntsinzi ibasubije inyuma muri uru rugendo rwo gushaka itike, ariko abakunzi b’Amavubi baracyizeza ko hari byinshi byo gukosora no kwitegura imikino iri imbere.

Abafana b’Afurika y’Epfo basoje bashimira ikipe yabo, aho abari ku kibuga no hanze yacyo baririmbaga bavuga bati “Congratulations Bafana Bafana!”.