Rusizi : Umugabo yatawe muri yombi nyuma yo gutwikisha umugore we amavuta ashyushye

Mu Karere ka Rusizi, haravugwa inkuru ibabaje y’umugabo witwa Nzeyimana Fanta, w’imyaka 42, utuye mu Mudugudu wa Mugerero, Akagari ka Kabuye, Umurenge wa Nyakarenzo, watawe muri yombi nyuma yo gutwikisha amavuta umugore we amuziza ko yamubujije gushyamirana n’umuturanyi.

Amakuru atangwa n’abaturage bo muri ako gace aravuga ko ibyabaye byatangiriye mu makimbirane asanzwe hagati y’uwo mugabo n’umuturanyi we, aho umugore we yagerageje kumubuza kurwana. Ariko aho kumva inama y’umugore, Nzeyimana ngo yahise amufatira icyemezo cy’ubugome bukabije, amumenaho amavuta amutwika.

Umwe mu baturage waganiriye na Igicumbi News. Yagize ati:“Byabaye ku mugoroba ubwo umugabo yari avuye mu kabari. Yaje arakara cyane, umugore amubuza kujya mu ntambara n’umuturanyi, ahita amufata aramutwika. Abaturanyi bahise baza gutabara batabaza n’inzego z’umutekano.”

Nyuma y’icyo gikorwa cy’ubugome, umugore yahise ajyanwa ku Bitaro bya Gihundwe, aho arimo kwitabwaho n’abaganga kubera ibikomere bikomeye yatewe n’ayo mavuta yamutwitse.

Umuvugizi wa Polisi mu Ntara y’Iburengerazuba, yavuze ko Nzeyimana Fanta yahise afatanwa n’inzego z’umutekano akajyanwa mu maboko y’urwego rw’ubugenzacyaha, aho arimo gukorwaho iperereza. ATI: “Uwo mugabo yatawe muri yombi kugira ngo akurikiranwe ku cyaha cyo gukomeretsa ku bushake, gishobora kumuhanisha igifungo cy’imyaka irenga itanu,” byemejwe n’umwe mu bayobozi b’inzego z’umutekano muri Nyakarenzo.

Inzego z’umutekano zirasaba abaturage kwirinda gukemura amakimbirane mu buryo bw’ubugome, ahubwo bagahitamo kuyageza ku nzego z’ibanze cyangwa iz’ubuyobozi zibifitiye ububasha.

Iyi nkuru yagaragaje ukuntu amakimbirane yo mu ngo akomeje kuba ikibazo gikomeye mu turere tumwe na tumwe, ahanini aterwa n’ubusinzi n’imyumvire ikiri hasi ku bagabo bumva ko bafite uburenganzira bwo gukubita cyangwa gukomeretsa abo bashakanye.

Ubushakashatsi bwakozwe na Rwanda Investigation Bureau (RIB) bugaragaza ko mu mezi atandatu ashize, mu turere twose tw’igihugu hamaze kwandikwa ibirego birenga 600 by’abagore bakubiswe cyangwa bakomerekejwe n’abagabo babo.

Ubuyobozi bw’Akarere ka Rusizi nabwo bwongeye gusaba abaturage gushyira imbere ibiganiro mu miryango, bubibutsa ko ubugome n’ubusambanyi bwose ari ibyaha bikurikiranwa n’amategeko.