Xi Jinping, Vladimir Putin na Kim Jong Un bagaragaye bwa mbere mu ruhame bari kumwe baha ubutumwa bukomeye Amerika

Kuri uyu wa Gatatu, umurwa mukuru w’u Bushinwa, Beijing, habereye y’amateka ubwo Perezida w’u Bushinwa, Xi Jinping, Perezida w’u Burusiya, Vladimir Putin, ndetse n’Umuyobozi w’Ikirenga wa Koreya ya Ruguru, Kim Jong Un, bagaragaraga bwa mbere mu ruhame bari kumwe mu karasisi ka gisirikare.

Byabereye mu kigo cy’imyitozo ya gisirikare giherereye i Beijing, rikurikirwa n’amagana y’abaturage ndetse n’abayobozi bakuru b’igisirikare cy’u Bushinwa. Abasesenguzi mu bya politiki mpuzamahanga batangaje ko iki gikorwa ari ubutumwa bukomeye bugenewe amahanga, by’umwihariko ibihugu byo mu Burengerazuba n’Amerika, bigaragaza ko ibi bihugu bitatu byafashe icyemezo cyo gushyira hamwe mu buryo bugaragara.

Ubutumwa bw’ukuboko kumwe

Abakurikiranira hafi imibanire ya politiki mpuzamahanga basobanura ko kuba aba bayobozi bagaragaye hamwe mu ruhame ari ikimenyetso cy’ubufatanye bukomeye hagati y’u Bushinwa, u Burusiya na Koreya ya Ruguru, mu gihe ibyo bihugu byose biri mu ntambara y’inyungu n’amagambo akomeye n’ibihugu byo mu Burengerazuba.

Muri iki gikorwa, ingabo z’u Bushinwa zerekanye intwaro zigezweho zirimo misile ndende, ibifaru bigezweho, indege za gisirikare zifite ikoranabuhanga rihanitse, ndetse n’abasirikare babarirwa mu bihumbi barimo batambuka imbere y’aba bayobozi.

Perezida Xi Jinping yavuze ko “u Bushinwa buzakomeza kwiyubakira ubushobozi bwo kurinda igihugu no guharanira amahoro arambye ku isi”, mu gihe Perezida Vladimir Putin na Kim Jong Un bose bahurije ku gushimangira ko ubufatanye bwabo bugamije “kubaka isi itagendera ku mabwiriza y’Amerika gusa”.

Impaka ku rwego mpuzamahanga

Benshi mu banyapolitiki bo mu Burengerazuba babifashe nk’ubutumwa bw’ihuriro rishya ryo guhangana na Amerika ndetse na bagenzi bayo mu Burayi. Abasesenguzi baravuga ko ibi bishobora gukomeza kongera umwuka mubi mu mubano w’ibi bihugu n’ibyo mu Burengerazuba, cyane cyane muri iki gihe intambara y’u Burusiya na Ukraine ikomeje gukaza umurego.

Umwanya w’ingenzi mu mateka

Ni ubwa mbere aba bayobozi batatu bagaragaye mu ruhame bari kumwe, ibintu abashakashatsi bavuga ko bishobora guhindura uburyo isi ibona ishusho y’imibanire y’ibihugu bikomeye. Abaturage benshi b’u Bushinwa bitabiriye iki gikorwa bavuga ko ari ishema rikomeye kubona igihugu cyabo kiri ku isonga mu guhuriza hamwe imbaraga n’abandi bafatanyabikorwa bakomeye.

Inkuru y’uyu munsi isiga ishusho y’uko isi iri kwinjira mu kindi gihe cy’ubutita, aho imbaraga z’Ubushinwa, u Burusiya na Koreya ya Ruguru zigenda ziyereka amahanga mu buryo bweruye kandi buhamye.