RwandAir yaguze indege ebyiri za Boeing 737-800
Sosiyete y’u Rwanda itwara abantu n’ibintu mu ndege, RwandAir, yongeye indege nshya ebyiri zo mu bwoko bwa Boeing 737-800, ikomeza umuvuduko wo kwagura ibikorwa no kongera ubushobozi bwo gutwara abagenzi.
Izi ndege nshya zifite ubushobozi bwo kwicaramo abantu 174 buri imwe, zikaba zitezweho gufasha mu ngendo ngufi n’iz’igihe gito kigereranyije (short and medium-haul routes). Ni intambwe ikomeye iyi kompanyi y’igihugu iteye mu rwego rwo kunoza serivisi no kwagura amashami yayo mu karere ndetse no hanze yaho.
Ubuyobozi bwa RwandAir buvuga ko izi ndege zitezweho gufasha mu kongera umubare w’ingendo ndetse no gufasha abagenzi kubona amahirwe menshi yo kugera ku masoko atandukanye ku giciro gito kandi mu buryo bwihuse.
RwandAir imaze kuba imwe mu masosiyete akomeye mu karere ka Afurika y’Iburasirazuba, ikaba ikorera ingendo mu bihugu byinshi byo ku mugabane wa Afurika, mu Burayi, Aziya ndetse no mu Bihugu by’Abarabu.
Kwagura ibyerekezo by’indege ni bumwe mu buryo iyi sosiyete ikomeje gushyira imbere mu rwego rwo guhatana ku isoko ry’ubwikorezi bwo mu kirere ndetse no gutuma u Rwanda ruba imwe mu nkingi zikomeye z’itumanaho n’ubucuruzi mpuzamahanga.
