M23 yafashe uduce turenga 5 mu rugamba rwo gufata Uvira
Mu gitondo cyo ku wa Gatandatu, umutwe wa AFC/M23 watangaje ko wafashe agace ka Rubumba, gaherereye ku misozi yo mu karere ka plateaux moyens d’Uvira mu ntara ya Kivu y’Amajyepfo.
Amakuru aturuka ku baturage hamwe n’imiryango y’abakurikiranira hafi imirwano muri ako gace aravuga ko uretse Rubumba, abarwanyi ba M23 banigaruriye Kitoga, Bibangwa, Rubuga na Masango muri iyo ntambara imwe.
Uvira yegerejwe intambara
Iyi ntambwe nshya y’abarwanyi b’uyu mutwe iri gufatwa nk’umushinga mushya wo kwegereza intambara Uvira, umujyi ukomeye uri ku nkombe z’ikiyaga cya Tanganyika. Ni umujyi w’ingenzi mu bukungu no mu bijyanye n’ubwikorezi, kuko uhuza Congo, u Burundi ndetse n’u Rwanda binyuze mu mihanda ikomeye yo ku rusisiro rwa Ruzizi.
Nk’uko byagenze mu rugamba rwo gufata Goma, abarwanyi ba M23 barimo gukoresha strategie yo gucunga imisozi n’uduce tuyegereye kugira ngo bazenguruke umujyi, bakate inzira zose z’amikoro n’ibiribwa, hanyuma bazatere umujyi igihe uzaba ucitse intege.
Impamvu batanyuze mu nzira ya plaine de la Ruzizi
Abasesenguzi bavuga ko M23 itashatse kunyura ku muhanda wa RN5 uva i Bukavu ugana i Uvira, kuko uwo muhanda urinzwe bikomeye n’ingabo za Leta ndetse n’imitwe ifatanyije na yo. Ahubwo bahisemo kwifashisha plateaux moyens na hauts plateaux, aho bafite ubufasha bw’umutwe wa Twirwaneho, umaze imyaka ufite imbaraga zikomeye muri ako gace.
Intumbero y’igihe gito: Uvira
Icyumweru gishize, M23 yari yamaze kwigarurira Kaniola na Nindja, ibintu bifatwa nk’ugushaka gufungura koridoro ibafasha kugera hafi ya Uvira. Ubu kandi, nyuma yo gufata Rubumba, haravugwa ko Kageregere na Kashatu, aho hantu hombi haherereye mu groupement ya Runingu, bishobora kuba aribyo bigo bikurikiyeho bigiye kugabwaho ibitero. Ibi bice byose bisigaye birahegereye, kuko biri nko mu minota 30 gusa uvuye mu mujyi wa Uvira.
Abarwanyi ba Wazalendo na FARDC mu gihirahiro
Uvira imaze igihe ibarizwamo imitwe itandukanye irwanira ku ruhande rwa Leta ya Congo, irimo Wazalendo ndetse n’ingabo z’u Burundi zaje gufasha FARDC. Ariko kuva muri Gashyantare uyu mwaka, aba barwanyi bashinjwa n’abaturage bo mu mujyi wa Uvira ubwicanyi, ubusahuzi ndetse n’ibindi bikorwa byo guhohotera abaturage.
Ibi byatumye bamwe mu baturage bumva ko niba M23 igerageje kwigarurira uyu mujyi, bishobora kubabera uburyo bwo kubona ituze n’umutekano bari barabuze mu mezi ashize.
Ese Uvira ishobora gufatwa mu minsi mike?
Ibikorwa by’imirwano n’uburyo AFC/M23 iri kugenda igera ku mijyi mikuru y’intara ya Kivu byerekana ko urugamba rugiye kwinjira mu gace gashobora guhindura byinshi ku ishusho y’intambara muri Congo. Abasesenguzi bavuga ko Uvira ishobora gufatwa vuba, nk’uko byabaye kuri Goma mu bihe bishize, uretse ko kuri ubu hari ikinyuranyo gikomeye: M23 ifite ubufasha bw’imitwe yo mu misozi, ndetse FARDC n’ingabo z’abafatanyabikorwa zimaze kugaragaza intege nke mu kuyihagarika.
