Umuhanzi Lil Nas X yatawe muri yombi nyuma yo kugaragara mu muhanda munini wa Los Angeles yambaye ubusa

Los Angeles, kuwa 22 Kanama 2025 – Umuraperi w’Umunyamerika uzwi cyane ku izina rya Lil Nas X, yashyizwe mu mapingu n’inzego z’umutekano nyuma yo kugaragara mu muhanda munini wo mu mujyi wa Los Angeles yambaye imyenda y’imbere gusa.

Amakuru yemejwe n’urubuga TMZ avuga ko uyu muhanzi w’imyaka 26 yahise ajyanwa kwa muganga kugira ngo yitabweho n’abaganga, nyuma y’uko ababonye ibyabaye bavuga ko asa nk’uwari mu bihe bidasanzwe ndetse wabuze umutuzo.

Uko byagenze

Abari muri uwo muhanda bavuga ko byabaye mu masaha ya mugitondo CYO kuri uyu wa kane ubwo Lil Nas X yagaragaraga agenda mu muhanda nyabagendwa wa Los Angeles, ibintu byahise bikurura abantu benshi batangajwe n’iyo myitwarire. Inzego z’umutekano zahise zitabara, zimushyiraho amapingu kugira ngo zimurinde we ubwe ndetse n’abandi, maze bimara akanya gato bamujyana ku bitaro bya hafi.

Kugeza ubu, ntiharasohoka itangazo ry’ubuyobozi ryasobanura neza icyabaye cyangwa impamvu yatumye uyu muhanzi yitwara muri ubwo buryo. Ariko bamwe mu bantu begereye ubuzima bwe bavuga ko bishoboka ko yari afite ikibazo cyo mu mutwe cyangwa andi makuba yihutirwa y’ubuzima.

Umuraperi uzwi cyane ku isi

Lil Nas X (Montero Lamar Hill) yavutse ku itariki 9 Mata 1999, avuka muri Atlanta muri Leta ya Georgia. Yamenyekanye cyane mu mwaka wa 2019 ubwo yasohoraga indirimbo Old Town Road yakoranye na Billy Ray Cyrus, ikaba ari yo ndirimbo yamaze igihe kirekire ku mwanya wa mbere muri Billboard Hot 100 mu mateka ya muzika yo muri Leta Zunze Ubumwe za Amerika.

Uyu muhanzi akomeje kumenyekana kandi kubera uburyo bwe bwihariye bwo kugaragaza umuziki, kwambara imyenda idasanzwe, ndetse no kuvuga ibintu bikomeye bidakunze kuvugwa n’abandi bahanzi b’iwabo. Yagiye agarukwaho cyane n’itangazamakuru kubera uburyo agaragaza umwirondoro we nk’umuhungu wiyemerera ko ari mu rukundo rumwe n’abo bahuje igitsina (gay), ibintu byatumye aba umwe mu bahanzi bakomeje kuvugisha benshi muri Amerika no ku rwego rw’isi.

Imyitwarire idasanzwe

Lil Nas X si ubwa mbere avuzwe mu nkuru zigaragaza imyitwarire itangaje. Yagiye agaragara yambaye imyambaro yerekana uburanga bwe mu buryo butari busanzwe, ndetse rimwe na rimwe yinjira mu bikorwa bivugisha benshi ku mbuga nkoranyambaga. Ariko kuba yagaragaye mu muhanda munini w’Amerika yambaye imyenda y’imbere gusa bikomeje kuzamura impaka ku buzima bwe bwite n’imiterere ye y’ihungabana.

Uko abakunzi be babifashe

Nyuma y’uko aya makuru asakaye, abakunzi be hirya no hino ku isi batangiye kugaragaza impungenge bakoresheje imbuga nkoranyambaga. Bamwe bamwifuriza gukira vuba no kubona ubufasha bwihutirwa, mu gihe abandi basaba ko hari icyo ubuyobozi bw’iwabo bwakora kugira ngo bamurinde kandi bamushyigikire mu rugendo rwe rwa muzika.

Icyizere cy’abakunzi ba muzika

N’ubwo ari mu bihe bigoye, benshi mu bakunzi ba muzika bakomeje kugaragaza ko bamushyigikiye, bavuga ko ari umuhanzi ufite impano idasanzwe kandi wagejeje byinshi ku muziki ku isi.